د کندز ښار په پل الچین سیمه کې، چې کروندګر د کښت لپاره کافي اوبه نه لري، یو شمېر بزګرانو د مني په موسم کې ګازرې کرلي دي. دغه کروندګر وايي، چې خپلې ځمکې د ژورو کوهیانو په واسطه خړوبوي. د سیمې کروندګر وايي چې دوی یوازې په کال کې دوه ډوله کښت؛ د اوړي په موسم کې خټکي او د مني په موسم کې ګازرې کري.
په کندز کې یو شمېر کروندګر، چې د غنمو کرکیله یې پیل کړې ده، وايي چې د کرنې زیات لګښتونه او د غنمو ټیټې بیې هغوی له اقتصادي ستونزو سره مخ کړي دي. کروندګر شکایت کوي چې د غنمو په کښت کې لګښتونه د دوی د وس څخه پورته دي، خو بیا هم مجبور دي چې په خپلو ځمکو کښت وکړي.
په کندز ولایت کې یو شمېر کروندګر وايي چې د مني په موسم کې د پالکو کښتونه کري چې دغه فصل نه یوازې په لږ وخت کې حاصل ورکوي، بلکې د ژمي د ورځنیو لګښتونو په پوره کولو کې هم دوی سره مرسته کوي.
د بغلان ولایت د خنجان ولسوالۍ د ګزان په سیمه کې د تازه میوو سیمهییز بازار چې د کابل-مزار شریف پر لویه لاره موقعیت لري، دمسافرو او سیمې خلکو لپاره تازه میوو د پلور یوه مهمه مرکز ګڼل کېږي.د میوو پدغه سیمه ییز بازار کې هټیوال وايي،چې د میوو خرڅلاو زیات دی، ځکه پر دغه لار زیات شمېر مسافر تګ راتګ کوي.
د کندز د علي اباد ولسوالۍ د یوې لرې پرتې سیمې، قزل سای کروندګر وايي، چې سږ کال به د تېر کال په پرتله د دوی حاصلات ډېر کمزوري وي او علت یې دا دی چې کښتونه یې مرض وهلي دي.
د کندز ولایت د علياباد ولسوالۍ کروندګر شکایت کوي چې د مني موسم په پیل کې، کله چې د ګلپیانو کرکېله کوي، د نباتي امراضو له کبله یې کښتونه زیانمنېږي. دوی وايي، چې په بازار کې د نباتي امراضو د مخنیوي درملو بیې لوړې او کیفیت یې ټيټ دی، چې له همدې امله ورته د ګلپي کښت په ګرانه بیه پرېوزي.
په کندز کې یو شمېر کروندګر وايي چې سږ کال نباتي امراضو د غلو دانو کښتونو ته سخت زیان اړولی، او حاصلات یې نه دي کړي. د کروندګرو په وینا، سږ کال یې په غنم، مۍ او کنځلو کې تاوان کړی دی.
په کندز کې یو شمېر کروندګرو، چې پخوا په خپلو کروندو کې په کښتونو بوخت وو، اوس د غواګانو فارمونو جوړولو ته مخه کړې ده. د چهاردرې ولسوالۍ یو اوسېدونکی، محمد نبي، چې پدې وروستیو کې یې د ۳۰ غواګانو یو فارم جوړ کړی وايي، که څه هم د فارم جوړولو لګښتونه زیات دي، خو ګټه یې له زراعتي کښتونو څخه زیاته ده.
په کندز کې کروندګر شکایت کوي چې سږ کال د جوارو حاصلات د نباتي مرضونو او چینجیو له امله سخت زیان لیدلی دی.ددغه ولایت د چهاردرې ولسوالۍ یو کروندګر، محمدالله، چې په څلور جریبه ځمکه کې یې جوار کرلي دي، وايي چې د سږ کال حاصلات یې د تېر کال د حاصلاتو په نیمه هم نه دي پوره شوي او مصارف یې نه شي پوره کولای.
په بلخ کې یو شمېر کروندګر چې پخوا یې کوکنار کرل، د بدیلو کښتونو لپاره د مرستې د نشتون له امله شکایت کوي. دوی وایي چې د کوکنارو په کرکېلې د بندیز درې کاله تېر شوي، خو تر اوسه له دوی سره د اصلاح شوو تخمونو، نباتي درملو او نورو بدیلو مرستو هیڅ مرسته نه ده شوې.
د کندز ولایت د چهادرې په ولسوالۍ کې یو شمېر کروندګرو چې د اوبو د کموالي له امله یې له څو کالونو ځنډ وروسته سږ کال شولې کرلې دي، وايي چې د شولو له حاصلاتو خوښ دي. ددغو کروندګرو په وینا د شولو حاصلات له نورو کښتونو څو چنده ښه وي او ترڅنګ یې ځمکه هم قوي کوي.
په بلخ کې کروندګر وايي چې سږ کال د لمرګلي حاصلات د یو ډول نباتي مرض له امله سخت زیانمن شوي دي. ددغه ولایت د چمتال ولسوالۍ یو کروندګر، محمدزیب، چې په لس جریبه ځمکه یې لمرګلي کرلي وو، وایي چې د تېرو څو کلونو په پرتله سږ کال د لمرګلي حاصلات څو چنده کم شوي دي.
د بلخ ولایت یو شمېر کروندګر وايي، چې سږ کال یې د نباتي امراضو له امله له کرل شوو فصلونو نه یوازې ګټه نه ده ترلاسه کړې، بلکې خپل لګښتونه یې هم نه دي پوره کړي. د چمتال ولسوالۍ کروندګر میرحمزه وایي، چې د سږني فصل حاصلات یې ډېر کم دي او حتی د کرکیلې لګښتونه یې هم نه دي پوره کړي.
په مزارشریف کې د سبزیو مارکیټ هټیوال وايي، سږ کال د سبزیو بیې د حاصلاتو د زیاتوالي، د سړو خونو نشتون او د صادراتو د بندېدو له کبله ډېرې ټیټې شوې دي. د هټیوالو په وینا، که څه هم سږ کال په کورني مارکیټ کې د سبزیو حاصلات زیات وو، خو د خلکو خراب اقتصادي وضعیت د سبزیو بازار اغېزمن کړی دی.
د ننګرهار د کوز کونړ ولسوالۍ کروندګر،سږ کال د ګنیو له حاصلاتو خوښ دي او وايي چې د دې فصل عواید تر نورو کرنیزو فصلونو څو برابره زیات دي. ددغه ولسوالې یو کروندګر مجاهد ملکزی، چې په خپلو ځمکو يې د جوارو او ګنیو کر کړی، وايي چې د ګنیو حاصلات یو جریب شاوخوا ۵۰ زره افغانۍ عواید ورکوي او زحمت یې هم کم دی.
د ننګرهار ولایت د سره رود ولسوالۍ یو شمېر کروندګر د ژمنیو کښتونو ښو حاصلاتو ته هیلهمن دي. د محبت په نوم ددغه ولسوالۍ د امرخېلو سیمې یو کروندګر چې په اجاره ځمکه یې د لېړوګانو کښت کړی، وایي که حکومت ورسره د اصلاح شویو تخمونو او کیمیاوي سرو مرستې وکړي، نو حاصلات او عواید به یې لوړ شي.
د ننګرهار د سره رود ولسوالۍ کروندګر شکایت کوي چې د نعناع حاصلاتو لپاره مناسب مارکېټ شتون نه لري او ډېری وخت کرلي فصلونه یې خپل لګښتونه هم نه شي پوره کولی.
د طالبانو له لوري د کوکنارو په کرکېله له بندیز وروسته، په بلخ ولایت کې یو شمېر کروندګرو بدیلو کښتونو ته مخه کړې، چې په دې کې د جارو کښت هم شامل دی. کروندګر وایي، چې د جارو کر لږ لګښت لري، خو ګټه یې د نورو کښتونو په پرتله یوه اندازه زیاته ده.
په کندز کې ځینې کروندګر وايي چې سږ کال د سبزیو حاصلات د نورو کښتونو لکه غله جاتو او میوو په پرتله ښه وو. د ددغه ولایت د چهاردرې ولسوالۍ یو کروندګر، محمد یعقوب، چې په لس جریبه ځمکه یې بېلابېل ډول سبزي کرلي دي، وايي چې د سبزیو حاصلات له نورو کښتونو زیات دي او د تېرو څلورو میاشتو راهیسې یې حاصلات اخلي.
په کندز کې کروندګر وايي، چې سږ کال د یو نباتي مرض له امله د مۍ د حاصلاتو کچه د تېر کال په پرتله څو چنده ټېټه شوې ده. ددغه ولایت د چهاردرې ولسوالۍ یو کروندګر، صفي الله، وايي، چې په دوه جریبه ځمکه کې یې مۍ کرلي، خو یوازې دوه بوجۍ حاصلات یې ترلاسه کړي دي.
نور پورته کول
