د ایرلنډ د کرکټ بورډ له افغانستان سره اوو نړیوالو سیالیو ته د خپلو لوبغاړو نومونه (سکواډ) اعلان کړل.
د افغانستان او ایرلنډ ترمنځ یوه د ټست لوبه، درې یوه ورځنۍ او درې شل اوریزې سیالۍ د فبرورۍ په ۲۸ نېټه په متحدو عربو اماراتو کې پیلېږي چې افغانستان یې کوربه دی.
د ایرلنډ کرکټ بورډ په خپل رسمي ویبسایټ کې نن سه شنبه فبروري شپږمه (سلواغه۱۷) لیکلي دي چې اندریو بالبرني به د ټسټ لوبډلې مشري کوي او بل لوبغاړی پاول سټرلینګ به یې د یوې ورځنیو او شل اوریزو سیالیو کپتان وي.
د ایرلنډ په اعلان شویو لوبغاړو کې متیو فاسټر، باري مککارتي، تئو ون ورکوم او کریګ یانګ څلور نوي لوبغاړي دي چې ممکن د افغانستان سره په لوبو کې خپلې نړیوالې لوبې پیل کړي. دوی تر دې دمه د ایرلنډ لپاره کومه نړیواله لوبه نه ده کړې.
د ایرلنډ نور اکثریت هماغه لوبغاړي دي چې افغان لوبغاړي ورسره اشنا دي او ورسره یې لوبې کړي دي.
د افغانستان د کرکټ بورډ څه موده مخکې د خپلو لوبو مهالوېش اعلان کړ چې له ایرلنډ سره دا لوبې هم په کې وي. افغانستان تېرځل په ۲۰۱۹ کال کې له ایرلنډ سره د ټست لوبه وکړه او ویې ګټله.
د افغانستان د کرکټ ملي لوبډله اوس په سري لانکا کې په سیالیو بوخته ده. تېره ورځ یې په سري لانکا باندې خپله لومړۍ ټست لوبه وبایلله.
له سري لانکا سره د دریو یوې ورځینو لوبو لړۍ د فبرورۍ په اتمه نېټه پیلېږي.
فورم \ دبحث خونه