په افغانستان کې د «غازي امان الله خان لست اې» کرکټ سیالۍ د پنجشنبې په ورځ جولاۍ ۲۵ (زمری څلورمه) د هندوکش سټرایکرز لوبډلې په بري پای ته ورسېدې.
د یوې ورځنیو لوبو دا سیالۍ د جولاۍ په لسمه نېټه د افغانستان د کندز په ولایت کې پېل شوې وې، چې څلورو لوبډلو هندوکش سټرایکرز، ماهیپر ستوري، پامیر لیجینډز او میوند اتلان په کې ولوبېدل.
دا د افغانستان د کورني کرکټ د یوې ورځنیو لوبو مهمې سیالۍ بلل کېږي چې د افغانستان د کرکټ د ملي لوبډلې د لوبغاړو په ګډون، د کورني کرکټ لسګونه ځوانان په کې لوبېږي. کرکټ بورډ وايي د دغو سیالیو هدف د افغان کرکټ لا ښه کول او ملي لوبډلې ته د ښو لوبغاړو موندل دي.
په پایلوبې کې د ماهیپر ستورو لوبډلې په ټاکل شویو ۵۰ اورونو کې د ۳۰۸ منډو هدف وټاکه. د دغې لوبډلې ځوان لوبغاړي بلال ترین ۱۳۶ او کپتان حشمت الله شهیدي ۶۶ منډې وکړې.
خو د هندوکش سټرایکرز لوبډلې د ځوان لوبغاړي زبید اکبري د ۱۳۴ منډو په واسطه دا هدف پوره او اتلولي یې وګټله. د دغې لوبډلې کپتان رحمت شاه ۶۸ منډې وکړې.
د افغانستان کرکټ بورډ په یوې اعلامیې کې ویلي دي چې د دغو سیالیو غوره توپ اچوونکی نوید ځدراڼ شو، چې ټول یې ۱۳ لوبغاړي سوځولي وو.
د لوبو غوره توپ وهونکی رحمت شاه شو چې ۳۹۵ منډې یې کړې وې.
د افغانستان کرکټ بورډ وايي چې په پام کې لري د اګست په میاشت کې شپږیزه لیګ پيل او د همدغه کال د سپتمبر په میاشت کې څلور ورځنۍ لوبې پیل کړي. شپږه لیګ شل اوریزې سیالۍ دي.
فورم \ دبحث خونه