د ایران دولتي رسنیو د شنبې په ورځ جنورۍ ۲۷ (سلواغې ۷) راپور ورکړ چې وسله والو د پاکستان پولې ته څېرمه د ایران په جنوب ختیځ کې نهه بهرني اتباع وژلي دي.
دا وژنې یوه اونۍ وروسته له هغې کیږي چې دواړو هېوادونو د پولې په اوږدو کې د یو بل پر سیمو بریدونه وکړل.
د ایران رسمي خبري اژانس مهر د عیني شاهدانو له قوله خبر ورکړی، چې نامعلومو وسله والو نن د شنبې په سهار د سراوان ښار په سرکین سیمه کې په یو کور کې نهه تنه غیر ایراني اتباع وژلي دي.
تر اوسه کوم کس یا ډلې د دغه مرګوني برید مسوولیت په غاړه نه دی اخیستی
سیستان - بلوچستان د ایران یو له څو محدودو ولایتونو څخه دی، چې اکثریت اوسیدونکي یې سني مذهبه دي.
دا سیمه د پولې پورې اخوا دیخوا ډزو په ګډون د جنایي ډلو لخوا د مخدره توکو د قاچاق او د بلوڅ د قومي لږکیو د یاغیانو او اسلامپالو ډلو د تاوتریخوالي شاهده ده.
د جنورۍ په ۱۸مه، پاکستان د ایران سره په سرحدي سیمه کې په هوايي بریدونو کې د اورپکو مرکزونه په نښه کړل. دا بریدونه وروسته له هغه وشول چې ایران د پاکستان په خاوره د توغندیو او ډرون الوتکو بریدونو وکړل.
تهران ویلي دي چې په پاکستان کې یې د جیش العدل اسلامپالې ډلې مرچلې یې په نښه کړي چې په وروستیو میاشتو کې یې په ایران کې وژونکي بریدونه تنظیم کړي وو.
د جیش العدل ډله چې په ۲۰۱۲ کال کې رامنځته شوه، ایران د تروریستي سازمانونو په لیست کې شامله کړې ده.
د ایران بریدونه چې د پاکستان په وینا لږ تر لږه دوه ماشومان په کې وژل شوي، د اسلام اباد له سختو نیوکو سره مخامخ شول. دغه هېواد له تهران څخه خپل سفیر وروغوښت او اسلام اباد ته یې د ایران د سفیر د راتګ مخه ونیوله.
تهران هم د دغه هېواد په خاوره کې د پاکستان د بریدونو له امله له پاکستان څخه خپل شارژدافیر وروغوښت. د ایران په خاوره کې د پاکستان په بریدونو کې لږ تر لږه نهه کسان وژل شوي دي.
خو د دواړو هېوادونو چارواکو تېره دوشنبه اعلان وکړ چې د تاوتريخوالي د کمولو او د خپلو ډيپلوماتيکو فعاليتونو د بيا پيلولو پرېکړه يې کړې او د دواړو هېوادونو سفيران تهران او اسلام اباد ته ستنېږي.
وسله والو د پاکستان پولې ته څېرمه په ایران کې نهه بهرني اتباع وژلي
![عکس ارشیف: د ایران او پاکستان ترمنځ پوله](https://gdb.voanews.com/01000000-c0a8-0242-7163-08dc17552cad_cx0_cy4_cw0_w250_r1_s.jpg)
فورم \ دبحث خونه