د افغانستان د سولې عالي شورا وايي، د افغان سولې په اړه د زلمي خلیلزاد او افغان حکومت ترمنځ د وروستۍ همغږۍ هرکلی کوي.
د سولې شورا خوشبیني ښودلې چې په یاده برخه کې د دواړو لورو ترمنځ وروستۍ همکاري، همغږي او د معلوماتو شریکول به د سولې له بهیر سره مرسته وکړي.
د دغه شورا ویاند غفور احمد جاوید نن یکشنبه د «چنګاښ پر۲مه» رسنیو ته په لېږلي غږیږ پیغام کې ویلي:"د افغانستان سولې پروسې لپاره د امریکا د متحده ایالاتونو د ځانګړي استازي ډاکټر صاحب زلمي خلیلزاد او د افغانستان دولت ترمنځ د افغان سولې لپاره وروستۍ همغږۍ، همکاري او همدارنګه د معلوماتو شریکول دا ډېر شه دي."
د سولې شورا مسؤلین دغه خوشبیني پر داسې مهال ښيي چې یوه اونۍ وروسته په دوحه کې د افغان سولې په اړه د امریکايي او طالب استازو ترمنځ د افغان سولې په اړه اتم پړاو مذاکرات پيلېږي.
د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد ویلي چې د یادو مذاکراتو نوی پړاو به د جون پر ۲۹ مه نېټه پيل شي.
ښاغلي خلیلزاد تېره ورځ پر خپل ټوېټر لیکلي چې افغانستان او قطر ته له سفر کولو وروسته ورته څرګنده شوه چې ټولې خواوې د سولې خبرو ګړیندي کېدل غواړي.
د سولې عالي شورا همدارنګه یو ځل بیا تمه ښودلې چې د زلمي خلیلزاد او طالب استازو ترمنځ په راتلونکي اتم پړاو مذاکراتو کې د افغان حکومت او طالبانو ترمنځ د مخامخ خبرو زمینه برابره شي.
تر دې مخکې خلیلزاد ویلي وو چې د سولې موافقه به څلور جامع برخې ولري چې پکې د ترهګرۍ د مخنیوي باورتیا، د عسکرو وتل، بین الافغاني مذاکرات چې یو سیاسي جوړجاړي ته لاره هواره کړي او پر یو هر اړخیز او تلپاتي اوربند موافقه شامله ده.
که څه هم د سولې د تر شویو مذاکراتو په هکله بیلابیل نظرونه شته، خو خلیلزاد ویلي تر هغې چې په پورتنیو مسلو موافقه شوې نه وي، په هیڅ شي موافقه نه کیږي.
