وروسته تر هغه چې رجب طیب اردوغان یکشنبه مې ۲۸ (غبرګولي۷) په ترکیه کې د جمهوري ریاست دویم پړاو تاریخي انتخاباتو کې ګټونکی اعلان شو، د نړۍ ګڼ شمیر مشرانو ورته مبارکې ویلې او د ګډ کار کولو ژمنه یې کړې.
د متحده ایالاتو جمهور رئیس جو بایډن ښاغلي اردغان ته د انتخاباتو ګټلو مبارکۍ ویلو تر څنګ په ټویټر کي پرته لدې چې د دواړو هیوادونو تر منځ د دوه اړخیزو اړیکو په هکله د تازه جنجالونو یادونه وکړي ولیکل، " د ناټو متحدینو په توګه دې ته سترګې په لار یم چې د دوه اړخیزو موضوعاتو او ګډو نړیوالو ستونزو په هکله په ګډه کار کولو ته دوام ورکړم."
په عین حال کې د متحده ایالاتو د بهرنیو چارو وزیر انټوني بلینکن ښاغلي اردوغان ته د مبارکۍ تر څنګ ترکیه د ناټو " ارزښت لرونکی متحد او شریک" هیواد بللی. ښاغلي بلینکن په ټویټر کې لیکلي، " د هغه حکومت سره ګډ کار کولو ته سترګې په لار یم چې د ترکیې ولس ټاکلی."
رجب طیب اردوغان چې ۶۹ کاله عمر لري د انتخاباتو په تاریخي دویم پړاو کې خپل سیال کمال قلیچدار اوغلو ته د څلور فیصده رایو په توپیر ماتې ورکړه. دا په تیرو سلو کالونو کې د ترکیې لپاره تر ټولو تاریخي او عواقب لرونکي انتخابات ګڼل کېدل.
د واشنګټن او انقرې اړیکې پدې تیرو څو کالونو کې د څو موضوعاتو له کبله د آزمایښت سره مخ شوي.
په ترکیه کې د مخالفینو ځپل، په سوریه کې نظامي عملیات، د روسیې د جمهور رئیس ولادمیر پوتین سره د رجب طیب اردوغان نږدې اړیکې او هغه هم په ګاونډي هیواد اوکراین د یرغل په ترڅ کې او د ناټو په سازمان کې د سویډن غړیتوب پر سر د انقرې مخالفت یو شمیر مهم موضوعات دي چې د ناټو د دې دواړو غړیو هیوادونو تر منځ اړیکې یې ستوزمنې کړي.
په همدې حال کې د روسیې جمهور رئیس ولادمیر پوتین ښاغلي اردوغان ته د مبارکۍ ویلو تر څنګ ویلي چې د "انتخاباتو ګټل په ښکاره توګه ښیي چې د ترکیې ولس ستاسو ملاتړ کوي".
د کرملین په ویبسایټ کې د ښاغلي پوتین له قوله ښاغلي اردوغان ته په خطاب کې لیکل شوي، " پدې انتخاباتو کې ستاسو بری د هغه منطقي او ځانګړي کار کولو نتیجه ده چې د ترکیې جمهوریت د مشر په توګه تاسو کړی."
په ویبسایټ کې دا هم لیکل شوي چې د "دې انتخاباتو ګټل ښکاره نښه ده چې د دولتي حاکمیت قوي کولو او خپلواکې پالیسۍ تعقیب کولو لپاره د ترکیې ولس ستاسو د هڅو ملاتړ کوي".
همدارنګه اروپایي اتحادیې او ناټو دوه هغه سازمانونه چې ښاغلي اردوغان څه موده وړاندې ورسره یو څه جنجال کړی و، هغه ته یې د بیا انتخاب کیدو مبارکې ورکړې.
د ناټو عمومي منشي ینز سټولټنبرګ په ټویټر کې د مبارکۍ تر څنګ ویلي دیته سترګې په لار دی چې د روان میلادي کال د جولای په میاشت کې د ناټو غړیو هیوادونو د مشرانو غونډې لپاره په ګډه چمتوالی ونیسي.
بل پلو بیا د اروپایي اتحادیې د کمیسیون مشرې ارسولا وان ډیر لیان ښاغلي اردوغان ته د مبارکۍ ویلو سربیره ویلي چې د ترکیې –اروپا اړیکو رغولو لپاره د د ګډ کار کولو هیله لري.