په پاکستان کې له ټاکنو وړاندې یو پلار وروسته له هغه خپل زوی وواژه چې دواړو په دې اړه مخالفت وښود چې پر خپل کور د کوم سیاسي ګوند بیرغ وځړوي.
د پولیسو په خبره، پېښه د خیبر پښتونخوا پېښور ښار ته څېرمه هغه مهال وشوه چې په قطر کې له کار څخه راستون شوي زوی د خپل کور مخې ته د پاکستان د پخواني صدراعظم عمران خان د تحریک انصاف ګوند بیرغ ځړولی و.
د پېښور د پولیسو چارواکي نصیر فرید وویل: "پلار خپل زوی په کور باندې د تحریک انصاف د بیرغ له ځړولو څخه منع کړی و، خو زوی یې د بیرغ د کښته کولو او تحریک انصاف له پرېښودلو څخه انکار وکړ."
د پولیسو دغه چارواکي وویل: "د دواړو ترمنځ د لانجې له زیاتېدو وروسته، پلار د غوسې په حالت کې، پر خپل ۳۱ کلن زوی د تومانچې ډزې کړي او له کور څخه تښتېدلی دی."
زوی یې روغتون ته پر لاره مړ شوی.
پولیس ددغه سړي د نیولو هڅه کوي چې د ملت پال عوامي نېشنل ګوند سره تړاو لري او پخوا یې ددغه ګوند بیرغ پر خپل کور ځړولی و.
په پاکستان کې د فبرورۍ په اتمه عمومي ټاکنې کیږي. په دغه هېواد کې ټاکنې ډیری وختونه د تاوتریخوالي سره مخ کیږي، او د اورپکو په بریدونو کې کاندیدان او د رایې ورکولو مرکزونه په نښه کیږي.
چارواکو ویلي چې د سرحد ساتنې ملیشو ۵۰۰۰ سرتیري ګومارل شوي چې د ټاکنو وړاندې د خیبر پښتونخوا امنیت ټینګ کړي.
فورم \ دبحث خونه