د هند په سوداګریز مرکز ممبۍ ښار کې د یوې سترې لوحې د لوېدلو په پېښه ۱۴ تنه مړه شوي او په لسګونو نور ټپیان شوي دي.
ځايي رسنیو د سه شنبې په ورځ مۍ ۱۴ (غوايي ۲۵) خبر ورکړ چې پولیسو ددغې لوحې د مالک په خلاف جنايي دوسیه پرانیستې ده.
دا ۷۰ متره پلنه لوحه د دوشنبې په ماښام د شدید باد او باران په نتیجه کې د ممبۍ ښار په ختیځ کې د تیلو پر یو پمپ ولوېده.
چارواکو د سه شنبې په ورځ وویل چې په پېښه کې لږ تر لږه ۷۵ تنه ژوبل شوي دي او د ژغورنې چارې دوام لري.
د ممبۍ ښاروالۍ د ایکس ټولنیزې شبکې کې لیکلي: "۴۴ ژوبل کسان دا وخت تر درملنې لاندې دي او ۳۱ تن له روغتون څخه رخصت شوي او د پیښې په ځای کې د ژغورنې عملیات روان دي."
د طبیعي پیښو سره د مبارزې ملي ادارې چارواکي ګاوراو چوهان وویل چې د تیلو پر پمپ د لوحې لوېدلو د ژغورنې چارې پیچلې کړي دي. هغه وویل: "د اور لګېدو له ویرې موږ له وسایلو کار نشو اخیستلی او د کرینونو په مرسته خځلې لیرې کوو."
ځايي رسنیو خبر ورکړی چې ددې لوحې د مالک شرکت "ایګو میډیا" په خلاف د عمدي وژنې قضیه ثبت شوې ده.
د ښاري شورا غړې راکي جادیو فرانس پرس ته وویل چې لوحه په خوندي ډول نه وه لګول شوې او ددې پیښې مخنیوی شونی و.
هغې وویل: "دا طبیعي پیښه نده. که لوحه په سمه توګه لګول شوې وای نو دا مرګونه به نه پېښېدل... دا یوه جبه زار او د ټیتې ارتفاع لرونکې سیمه ده، پکار وه چې د لوحې ستنې د ځمکې د تل له ډبرې سره نښلول شوې وای."
د دوشنبې د ورځې باد او باران په ممبۍ کې ونې له ریښو ایستلي، په ځینو سیمو کې بریښنا پرې شوې او د ښار د ریل ګاډي شبکه له ګډوډۍ سره مخامخ شوې ده.
د ممبۍ په نړیوال هوایي ډګر کې الوتکې په موقتي توګه له پرواز څخه منع شوي او دغه هوايي ډګر ته لږ تر لږه ۱۵ پروازونه لغوه شوي دي.
د مهاراشترا ایالت د اعلی وزیر مرستیال دیویندر فډنویس په ایکس کې لیکلي چې د هغه حکومت د پیښې په اړه د "لوړې کچې تحقیقاتو" امر کړی دی.
هغه زیاته کړه چې ایالتي حکومت د هر مړ شوي کس کورنۍ ته د ۵۰۰ زره هندي روپیو (۶۰۰۰ ډالر) تاوان ورکولو اعلان کړی دی.
فورم \ دبحث خونه