د اروپايي ټولنې د بهرنیو چارو وزیران د دوشنبې په ورځ اګست ۱۶ (زمري۲۵) د افغانستان د وضعیت په اړه غونډه کوي.
د اروپايي ټولنې د بهرنیو اړیکو مسئول جوزپ بورل په خپل ټویټر کې لیکلي دي چې په افغانستان کې وروستیو بدلونونو ته په کتو پتیل شوې چې دا غونډه وشي.
نوموړي لیکلي دي: «افغانستان په یوې څلور لارې کې ولاړ دی. د خلکو امنیت او سلامت او همدغه راز نړیوال امنیت قمار ته اېښودل شوي.»
اروپايي ټولنه هڅه کوي چې خپل افغان کارکوونکي پیدا او د غړو هېوادونو په مرسته یې یو مصئون ځای ته انتقال کړي خو د دغو افغان کارکوونکو شمېر لا معلوم نه دی.
د اروپايي ټولنې یو ویاند رویټرز اژانس ته ویلي دي چې د افغان کارکوونکو د اېستلو مسئله مهمه ده او دوی یې جدي ګڼي.
تمه کیږي چې د دغې ټولنې غړي هېوادونه به اروپا ته د افغان کډوالو د ورتګ په اړه د طالبانو د واکمنۍ پر اغیزو هم خبرې وکړي.
په همدې حال کې اترېش ویلي د هغو افغانانو اېستل به روان ساتي چې پناه غوښتنې یې رد شوي دي.
یو شمېر اروپايي هېوادونه دا اندېښنه هم لري چې د طالبانو له راتګ وروسته به اروپا ته د افغان کډوالو ورتګ نور هم چټک او زیات شي.
