مسکو د دوشنبې په ورځ دسمبر ۱۱ (لیندۍ ۲۰) وویل، د روسیې راتلونکي د ولسمشرۍ ټاکنې به د اوکراین په هغو سیمو کې هم وشي چې کرملین یې تیر کال له روسیې سره د یو ځای کولو ادعا وکړه.
اټکل کیږي چې د ۲۰۲۴ کال د مارچ په دغو ټاکنو کې ولادیمیر پوتین د پنځم ځل دپاره ولسمشر شي.
د انتخاباتو مرکزي کمیسیون ویلي چې د اوکراین په دونیڅک، لوهانسک، زاپوریژیا او خرسون کې به رایه اچونه وشي. په دغو سیمو کې روسیه لا تراوسه بشپړ پوځي کنټرول نه لري.
د تاس دولتي خبري اژانس د ټاکنو د کمیسیون د مرستیال نیکولای بلایوف له قوله ویلي چې "دا پریکړه په متفقه توګه تصویب شوې ده."
ټاکنې به د مارچ له ۱۵ تر ۱۷ پورې په دریو ورځو کې کېږي. د کرملین منتقدین استدلال کوي چې په دغو ټاکنو کې د شفافیت تضمین کول به خورا ستونزمن کار وي.
د روسیې د حکومت ډیری سیاسي مخالفان په بند یا جلاوطنۍ کې دي او تمه نه کیږي چې پوتین به پنځم ځل د ولسمشر کېدو په وړاندې له کومې لویې ننګونې سره مخ شي.
پنځو ګوندونو ته اجازه ورکړل شوې چې د لاسلیکونو راټولولو پرته د ۲۰۲۴ کال ټاکنو ته نوماندان وړاندې کړي. دغه ټول ګوندونه د کرملین او په اوکراین کې د پوځي عملیاتو ملاتړ کوي.
اوکراین له نړیوالې ټولنې غوښتي چې "د اوکراین په اشغال شویو سیمو کې د ولسمشریزو ټاکنو د ترسره کولو لپاره د روسیې اقدام وغندي."
کیف پر لوېدیځ غږ کړی، چې ددې کار پر انفرادي مسئولو کسانو بندیزونه ولګوي.
روسیې تر دې مخکې د اوکراین په اشغال شویو سیمو کې انتخابات ترسره کړي وو، چې د کیف او لویدیځ له خوا رد شوې او نتیجې یې باطلې وبلل شوې.
مسکو د سپتمبر په میاشت کې د اوکراین په څلورو سیمو کې سیمه ایزې ټاکنې کړې وې او یو کال دمخه یې له روسیې سره ددغو سیمو د ضمیمه کولو لپاره "ټولپوښتنه" ترسره کړې وه.
دغه ټولپوښتنه او ټاکنې هم د کيف او لويديځ له خوا وغندل شوې.
روسیې په ۲۰۱۴ کال کې په یو اړخیزه توګه د کریمیا ټاپووزمه له اوکراین جلا او د خپلې خاورې ضمیمه کړه او له هغه راهیسې پکې د روسیې ټاکنې کیږي.