د متحده ایالاتو ولسمشر جو بایډن د پنجشنبې په ورځ جولای ۲۵ (زمری څلورمه) په سپینه ماڼۍ کې د اسرائیل د صدراعظم بنیامین نتنیاهو کوربه دی. تمه کیږي چې د دواړو مشرانو خبرې د غزې په تړانګه کې په وضعیت باندې تمرکز ولري.
د متحده ایالاتو یو لوړپوړي چارواکي د چهارشنبې په ورځ خبریالانو ته وویل چې بایډن به په دې لیدنه کې له اسرائیل څخه د واشنګټن د "اوسپنیز ملاتړ" پر ژمنې ټینګار وکړي.
دغه لوړپوړي چارواکي وویل چې دواړه مشران به د حماس، حزب الله او د یمن د حوثيانو په ګډون په سیمه کې د ایران د ملاتړ لرونکو اورپکو ډلو په اړه هم وغږیږي.
تمه کیږي چې بایډن او نتنیاهو د داسې یو اوربند په ټینګولو هم خبرې وکړي چې په ترڅ کې یې په غزه کې جګړه ودریږي، د حماس له ولکې څخه یرغمل کسان خوشې شي او د غزې تړانګې ته بشردوستانه مرستې جریان ومومي.
دا مطلب هم ولولئ نتنیاهو له امریکا وغوښتل اسرائیل ته د پوځي مرستو په ورکولو کې بیړه وکړي
د متحده ایالاتو، مصر او قطر په منځګړیتوب په سیمه کې د اوربند او یرغمل کسانو د خوشې کولو لپاره د تیرو څو میاشتو راهیسې مذاکرات او هلې ځلې روانې دي خو تراوسه یې نتیجه نده ورکړې او په کړکېچ کې د لبنان د حزب الله او د یمني حوثیانو له شاملېدو سره داسې اندېښنې زیاتې شوي چې دغه کړکېچ به د منځني ختیځ نورو سیمو ته هم وغځیږي.
ټاکل شوې چې بایډن او نتنیاهو له خبرو وروسته له هغو امریکايي کورنیو سره وویني چې غړي یې د حماس لخوا په یرغمل شویو کسانو کې شامل دي.
نتنیاهو د پنجشنبې په ورځ ناوخته د متحده ایالاتو د ولسمشر له مرستیالې او د نومبر د ولسمشرۍ په ټاکنو کې د دیموکرات ګوند له احتمالي کاندیدې کاملا هریس سره هم وګوري.
د امریکا د ۲۰۲۴ کال ټاکنو ته د جمهوري غوښتونکو نوماند ډونالډ ټرمپ به د جمعې په ورځ په فلوریډا ایالت کې د نتنیاهو کوربه وي.