د روغتیا نړیوال سازمان د چهار شنبې په ورځ اکتوبر ۱۹ (تلې ۲۷) وویل په یوګندا کې د ایبولا ساري ویروس له امله د وژل شویو شمیر ۴۴ کسانو ته رسیدلی دی.
د یاد سازمان رئیس ټډروس ادهانم ګبریوسیس په ژنیف کې یو خبري کنفرانس ته وویل، په یاد هیواد کې د ایبولا ۶۰ تائید شوي، ۲۰ احتمالي موارد موجود دي، ۴۴ کسان وژل شوي او ۲۰ نور بیرته روغ شوي دي.
د روغتیا د نړیوال سازمان مشر وویل:" موږ اندیښمن یو چې ښايي په زیانمنونکو ټولنو کې د انتقال زنجیره یي حالت او ډیر تماسونه موجود وي."
تر دې مخکې د روغتیا نړیوال سازمان د اکتوبر په پنځمه نیته د وژل شویو شمیر ۲۹ تنه ښودلی وو.
د یوګندا ولسمشر یووري موسیویني تیره اوونۍ د هغه هیواد د مرکز په دوو ناحیو کې د ایبولا ویروس د خپریدو له امله پر سفرونو، ګرځیدو راګرځیدو بندیز ولګاوه او عامه ځایونه یې بند کړل.
د هغه هیواد ولسمشر همدارنګه تر دې مخکې سنتي معالجینو ته ویلي وو چې د ویروس د خپریدو د مخنیوي په هدف په بستر کې د ناروغانو درملنه ودروي.
نوموړي همدارنه پولیسو امر کړی هغه کسان ونیسي چې په ایبولا اخته دي او د قرنطین سره مخالفت کوي.
چارواکو څرګنده کړې که څه هم یو دوه مثبتې قضیې د هغه هیواد په مرکز کمپالا کې لیدل شوي خو ویروس د هغه هیواد په مرکزي ناحیو کې خپور شوی دی.
ایبولا د بدن د مایعاتو له لارې خپریږي او عمده نښتې یې تبه، زړه بدی، خونریزی او نسناستی دي.
د ویروسونو د خپریدو مخنیوی ستونزمن دی په خاص ډول په ښاري سیمو کې. یوګندا د وروستي ځل لپاره په ۲۰۱۹ کل کې د ایبولا له امله تلفات درلودل.
په یوګندا کې د ایبولا اوسنی ډول چې د سوډان د ایبولا په نامه یادیږي، تر اوسه کوم خاص واکسین هم نلري. د روغتیا نړیوال سازمان وایي په راتلونکو څو اوونیو کې به په هغو درملو کلنیکي آزمایښتونه پیل شي چې له دې ویروس سره مبارزه کولی شي.
