د ملګرو ملتونو د عدالت نړیوالې محکمې د جمعې په ورځ جنوري ۲۶ (سلواغې شپږمه) اسرائیل ته امر وکړ چې د فلسطینیانو په خلاف د نسل وژنې د ممکنه عمل مخه ونیسي او ملکي خلک وژغوري، خو دغه محکمه د تمې خلاف د اوربند د حکم په صادرولو کې پاتې راغلې ده.
د عدالت د نړیوالې محکمې مشر جوان ای ډونګو نن د ۱۷ قاضیانو د یو هیئت پریکړه اعلان کړه
پر اسرائیل باندې د نسل وژنې دغه تور جنوبي افریقا لګولی او په اړه یې د هالنډ په هاګ کې د عدالت نړیوالې محکمې ته عریضه کړې وه.
د جنوبي افریقا په عریضه کې، په غزه کې د حماس سره په جګړه کې د اسرائیل پوځي عملیات د نسل وژنې په معنی بلل شوي و او له قاضیانو یې غوښتي و چې اسرائیل ته امر وکړي چې "په سمدستي توګه په غزه کې خپل نظامي عملیات وځنډوي." خو د هاګ محکمې په حکم کې د اوربند غوښتنه نه ده شامله.
د محکمې په حکم کې د اسرائیل له خوا په غزه کې د نسل وژنې د امکان تائید یا رد نه دی څرګند شوی چې سپیناوی یې ښايي کلونه وخت نیسي.
دې قضیې د اسرائیل غوسه پارولې او په محکمه کې د اسرائیلي وکیل تال بیکر ویلي چې د جنوبي افریقا په عریضه کې "واقعیت او قانوني انځور په ژوره توګه تحریف شوی" دی.
بیکر محکمې ته په اسرائیل کې د حماس د جنګیالیو د اکتوبر د اوومې د برید د انځورونو د ښودلو پر وخت وویل: "که چیرې داسې اعمال ترسره شوي وي چې نسل وژنه وګڼل شي، نو بیا نسل وژنه د اسرائیل په خلاف ترسره شوې ده."
بیکر هغه ادعاوې رد کړې چې د اسرائیل عملیات د غزې عام اتباع په نښه کوي.
هغه وويل، د پوځ موخه یې "د خلکو له منځه وړل نه، بلکې د هغو خلکو ژغورنه ده چې په څو جبهو کې تر بريدونو لاندې دي."
د عدالت نړیوالې محکمې لنډمهالې پریکړې په نړیواله کچه د پلي کېدو حقوقي وړتیا لري.
د اروپايي ټولنې د بهرنۍ تګلارې ویاند پیټر سټانو وړاندې ویلي و، چې د ۲۷ هېوادونو ددغې ټولنې دریځ روښانه دی: "موږ د نړیوالې محکمې درناوی کوو او په دې نظر یو چې د نړیوالې محکمې پرېکړو ته باید درناوی وشي. دا د ملګرو ملتونو تر ټولو ستره محکمه ده."
اسرائیل پر غزې خپل پراخ هوايي او ځمکني بریدونه وروسته له هغه پیل کړل چې د اکتوبر په اوومه د حماس اورپکو د په اسرائیل کې د یو بې ساري برید په پایله کې د اسرائیلي مقاماتو په خبره، شاوخوا ۱۲۰۰ کسان ووژل، او شاوخوا ۲۴۰ نور یې یرغمل کړل.
نتنیاهو ژمنه کړې چې تر هغه به جګړه روانه وي تر څو چې د هغه هیواد د حماس په وړاندې "بشپړ بریا" ترلاسه کړي.
په غزه کې د روغتیا وزارت وايي، د اسرائیل په بریدونو کې له ۲۶ زره زیات کسان وژل شوي چې اکثریت یې ښځې او ماشومان دي او ۶۴ زره نور ټپیان شوي دي. په دغو شمېرو کې د ملکي وګړو او جنګیالیو ترمنځ توپیر نه دی شوی.
د اسرائیل پوځ ادعا کوي چې په غزه کې لږ تر لږه ۹۰۰۰ وژل شوي د حماس وسله وال دي.
د ملګرو ملتونو چارواکو ویلي چې په غزه کې د نفوس څلورمه برخه له لوږې سره مخامخ دي او وېره یې ښودلې چې ډیر نور خلک به د ناروغیو د خپرېدو له امله مړه شي.
د اسرائیل د پوځي عملیاتو په نتیجه کې د غزې د ۲.۳ میلیونه نفوس نږدې ۸۵ سلنه له خپلو کورونو بې ځایه شوي او د غزې ښار او شمالي غزې ډیرې برخې په کنډوالو بدلې شوي دي.
فورم \ دبحث خونه