د ریختر په کچه په دغه ۶.۳ درجه زلزله کې لږ تر لږه ۲۰۰۰ کسان مړه شوي دي.
په داسې حال کې چې یو شمېر رضاکارانو د مړو دپاره قبرونه کېندل، نورو بیا له خپلو بیلونو او تیشو سره د نړېدلو کورنو په خځلو کې په ژوندي پاتې شویو انسانانو پسې کتل.
ملګري ملتونه وايي، د زنده جان ولسوالۍ په ۱۱ کلیو کې ټول کورونه نړېدلي او په ټوله کې د څه باندې ۱۷۰۰ کورنیو لږ تر لږه ۱۲ زره کسان اغېزمن شوي دي.
ټولو اغېزمنو شویو کورنیو ته د سرپناه برابرول د طالبانو د حکومت لپاره چې د ۲۰۲۱ کال په اګست کې د بیا واکمن کېدو راهیسې له نړیوالو مرستندویه سازمانونو سره خرابې اړیکې لري، یوه ننګونه بلل کیږي.
په هرات ښار کې د بې سرحده ډاکټرانو ټولنه وايي، په زلزله کې د زخمي شویو کسانو درملنې هم ستونزې ایجاد کړي دي.
دغې ټولنې په خپل ایکس (ټویټر) حساب کې ولیکلي: "له پرون راهیسې۳۴۰ څخه ډیر ناروغان رخصت شوي، خو دوی نه غواړي چې روغتون ترک کړي، ځکه چې کورونه یې نړېدلي او د تګ دپاره ځای نلري."
محلي چارواکو او مرکزي ادارې د زلزلې د تلفاتو متضادې شمېرې ورکړي دي، خو د طبیعي پېښو پر وړاندې د مبارزې وزارت د مړو شمېر ۲۰۵۳ ښودلی دی.
ملګرو ملتونو د سه شنبې په ورځ وویل چې د مړو شمیر نږدې ۱۳۰۰ ته رسیدلی او لږ تر لږه ۵۰۰ نور لا هم ورک دي چې ډیری یې ښځې دي.
د هرات زلزله په تیرو ۲۵ کلونو کې په افغانستان کې تر ټولو خونړۍ زلزله بلل شوې ده.
د جون په میاشت کې په پکتیکا کې د ریختر په کچه ۵.۹ درجې زلزلې کې لږ تر لږه ۱۰۰۰ کسان مړه او په لسګونو زره نور بې سرپناه پاتې شول.
د طالبانو چارواکو په افغانستان کې د ملګرو ملتونو او نادولتي موسسو سره د ښځو پر کار کولو بندیز لګولی، چې په زلزله ځپلو سیمو کې یې د محافظه کارو کورنیو د اړتیاوو ارزونه ستونزمنه کړې ده.
د بخښنې نړیوال سازمان ویلي چې د طالبانو حکومت باید ډاډ ترلاسه کړي چې د ژغورنې او مرستې عملیات "پرته له تبعیض" ترسره کیږي او بشردوستانه ادارې اغیزمنو سیمو ته بشپړ او له خنډ پرته لاسرسی لري.
د هرات زلزله په داسې حال کې پیښه شوې چې له افغانستان څخه د بهرنیو ځواکونو د وتلو او طالبانو د بیا واکمن کېدو راهیسې دغه هېواد له اقتصادي بحران سره مخامخ دی.
د ماشومانو د ژغورنې ادارې دا زلزله "د یو بحران پر سره بل بحران" بللی دی.
د وروستیو کلونو سختې وچکالۍ هم د هرات ۱.۹ میلیون نفوس لرونکي ولایت په زراعت تکیه اقتصاد ته زیان پېښ کړی دی.
فورم \ دبحث خونه