د ټویټر شبکې د طالبانو د ویاند ذبیح الله مجاهد او د طالبانو د حکومت د بهرنیو چارو وزارت د ویاند بلال کریمي د ټویټر حسابونه په موقت ډول محدود کړي دي.
د ذبیح الله مجاهد وروستی ټویټ د کابل عیدګاه جومات ته نژدې د یکشنبې د ورځې اکتوبر ۳ (تله ۱۱) چاودنې په اړه و. په عیدګاه کې د ښاغلي مجاهد د مور فاتحه روانه وه چې چاودنه وشوه او یو شمېر خلک یې ووژل او ژوبل کړل.
د طالبانو د دغو دواړو ویاندویانو د ټویټر په حسابونو کې دغې شبکې دا پیغام خپور کړی دی: «احتیاط: دا حساب موقتآ محدود شوی دی.دا خبرداری ځکه ګورئ چې په دغه حساب کې ځینې غیر معمول فعالیتونه موجود وو.»
تر دې مخکې چې طالبان په افغانستان کې واکمن نه و، یو شمېر خلکو د ټویټر په شبکې انتقاد کاوه چې د طالبانو ټویټونه نه محدودوي او یا یې نه بندوي. منتقدین په دې نظر وو چې طالبان له دغې لارې تبلیغات کوي او د خپلې ډلې د خشونت اوتاوتریخوالي په اړه په دغو حسابونو کې خبرونه خپروي.
د ښاغلیو مجاهد او کریمي ټویټونه د دغې شبکې له لوري تائید شوي نه دي، مګر د طالبانو اړوندو فعالیتونو خبرونه له دغو حسابونو خپرېدل.
