په کندهار کې نن غرمه مهال د نړیوالو ځواکونو د موټرو پر کاروان ځانمرګی برید شوی، چې د قاطع ملاتړ ماموریت قومانداني وایي په دغه برید کې یې ځواکونو ته د سر زیان رسیدلی دی.خو دا چې څو تنه مړه او ټپیان دي دقیق شمیر یې نه دی څرګند کړی.
دا برید نن غرمه ۱۲ بجې د کندهار ښار په پنځه حوزه کې هوايي ډګر ته پر غځيدلې لار د ملي امنیت د چټک غبرګون د قطعې له قرار ګاه سره نږدی شوی دی.
په کابل کې د قاطع ملاتړ ماموریت قوماندانۍ په یو بیان کې ویلي چې نن غرمه مهال په کندهار کې د ناټو د ځواکونو په یو کاروان برید شوی چې له امله یې دغو ځواکونو ته مرګ ژوبله رسیدلې ده.
دغې قوماندانۍ ویلي چې د پیښې په اړه به نور جزئیات له پلټنو وروسته رسنیو سره شریک شي.
د کندهار امنیه قومندان جنرال عبدالرازق له امریکاغږ اشنا رادیو سره په خبرو کې هم دا پېښه تائید کړې ده.
تر پېښې وروسته سیمه د افغان او نړیوالو ځواکونو له لوري کلا بنده شوې او خبریالان د پېښې سیمې ته نه پرېښودل کیږي.
دغه راز د دغه برید وروسته د کندهار – بولدک لار هم په موقتي توګه د ترافیکو پرمخ تړل شوې.
د پېښي عیني شاهدان وايې چې ځانمرګی برید کونکي نن غرمه خپل چاودیدونکو توکو ډک پک اپ موټر ته د نړیوالو ځواکونو د موټرو کاروان سره نږدې چاودنه ور کړه
د ښوراندام د سیمي یوه اوسیدونکي اخترمحمد امریکاغږ اشنا رادیو ته وويل چې چاودنه ډيره زوروره وه او د برید پر مهال ملکي خلک هم په سیمه کې وو.
تر اوسه پوري دا معلومه نه ده چې دا برید د کوم هیواد پر ځواکونو شوی، خو د کندهار په هوايي ډګر کې امریکايي او رومانیايي سرتیري تر ډېره د هوايي ډګر د امنیت چاري سمبالوي.
تراوسه کومې ډلې د دغه برید مسولیت نه دی اخیستی.
