افغان نظامي چارواکو او په افغانستان کې د قاطع ملاتړ ماموریت ویلي چې د بګرام په هوايي ډګر د توغندیو برید شوی دی.
د قاطع ملاتړ ماموریت ځواکونو نن د اپریل په نهمه په یوې اعلامیه کې ویلي چې نن سهار د بګرام په هوايي ډګر کې پنځه توغندي لګېدلي خو چا ته په کې زیان نه دی اوښتی.
د افغانستان د کورنیو چارو وزارت هم تائید کړې ده چې دا برید د پنجشنبې په ورځ د اپریل په نهمه (وري ۲۱) د سهار شاوخوا ۵:۴۰ بجې شوی دی.
د دغه وزارت ویاند طارق آرین خبریالانو ته وویل توغندي د قلعچې په نوم کلي کې په یو کرولا ډوله موټر کې ځای پر ځای شوي وو او پولیسو یې په اړه پلټنې پیل کړي دي.
تر اوسه د دغه برید مسولیت چا نه دی منلی او طالبانو هم په کې لاس لرل رد کړي دي.
خو دغې ډلې له دې وړاندې ګواښ کړی و که امریکايي ځواکونه او متحدین یې پر طالبانو بریدونو ته دوام ورکړي، په متقابل عمل به لاس پورې کړي.
د بګرام په هوايي ډګر د توغندیو برید په داسې حال کې شوی چې تیره ورځ افغان حکومت له دغه زندان څخه ۱۰۰ طالب بندیان خوشې کړل او ټاکل شوې چې نن د دغې ډل ۱۰۰ نور بندیان هم خوشې شي.
