د جنوب زون د شپږو ولایتونو د حکومتوالۍ او امنیتي وضعیت د څارنې او سمون په موخه د افغانستان د ملي امنیت شورا سلاکار حمدالله محب نن سهار هلمند ولایت ته رسیدلی دی.
له نوموړي سره د افغانستان لوی درستیز او د کورنیو چارو وزارت امنیتي مرستیال هم پدې سفر کې ملګري دي.
د ملي امنیت شورا سلاکار نن یکشنبه جنورۍ ۱۷( مرغومې ۲۸) د لښکرګاه په شمال کې د ۲۱۵ میوند قول اوردو مرکز ته له رسیدو سره سم د پوځ له ځانګړو قواو سره لیدلي.
د ۲۱۵ میوند قول اوردو مطبوعاتي دفتر وايي چې د هلمند او نیمروز ولایتونو د امنیتي وضعیت په اړه به د یاد قول اوردو مسئولین خپل معلومات شریک کړي.
دغه راز د ملي امنیت شورا له لوري په خپره شوې اعلامیه کې ويل شوي چي د ملي امنیت شورا سلاکار به د دایکندي او نیمروز ولایتونو په ګډون د جنوب زون په څلورو ولایتونو کندهار، هلمند، زابل او اروزګان ولایتونو کې د همږغۍ د زیات والي په موخه د یادو ولایتونو د ولایتي چارواکو سره هم وویني.
اعلامیه زیاتوي چې ښاغلی محب به د اتل او میوند قول اوردو ګانو د ماموریت په ساحو کې چې شپږ ولایتونه پکښې شامل دي، د امنیتي او حکومتدارۍ د وروستي وضعیت ارزونه وکړي.
تیره اونۍ هم د ملي امنیت شورا سلاکار کندهار ته د سفر پر مهال د والي په ګډون د دې ولایت ځيني نوي نظامي مامورین خپلو دندو ته ور وپيژندل.
له تیرو ۳ میاشتو راهیسې د کندهار تر څنګ د جنوب په ټولو ولایتونو کې امنیتي وضعیت د ډيري اندېښنې وړ بلل کیږي چي له کبله يې تر سل زره زیاتي کورنۍ د جګړو له سیمو څخه کډوالي شوي.
حمدالله محب تیره ورځ د شمالي ولایتونو د امنیتي وضعیت ارزولو لپاره بلخ ولایت ته او تر هغه مخکې بیا تیره اونۍ د ختیځو ولایتونو د امنیتي وضعیت ارزولو لپاره ننګرهار ولایت ته تللی و.
