د کندوز ولایتي چارواکي وايي، د کندوزـ تخار لویه لار تیره ورځ له ماسپښین ورورسته له طالبانو بیرته نیول شوې وه خو په لاره کې د ښخ شویو ماینونو له امله دوی پرې عامو خلکو ته لار د تګ راتګ اجازه نه ورکوله.
ددغې لارې د خلاصون لپاره له تیرې یوې اونۍ راپه دیخوا د افغان ځواکونو او وسله والو طالبانو تر منځ نښتې روانې وې.
چارواکي د لارې د خلاصون په عملیاتو کې طالبانو ته د تلفاتو د وراړلو یادونه کوي، ددغې پنځه ویشت کیلومتره اوږدې لارې پر سر ټولې موجودې پوستې د طالبانو تر محاصرې لاندې وې او څو پوستې طالبانو نیولې هم وې.
تیره ورځ افغان ځانګړو ځواکونو ددغې لارې د خلاصون عملیات پيل کړي وو.
له بلې خوا د پولیسو له خوا په یوه خپره شوې اعلامیه کې راغلي چې د چاردرې په ولسوالۍ کې د افغان هوايي ځواکونو په بریدونو کې ۱۱ تنه طالبان وژل شوي چې د قاري احمدشاه په نامه ددغې ډلې یو قوماندان هم په کې شامل دی.
اعلامیه په دغه هوايي برید کې د یو هغه رینجر د تخریب خبر هم ورکوي چې وسله والو طالبانو له افغان ځواکونو څخه نیولی و.
