د عراق پارلمان د سه شنبې په ورځ په یوه رایگرۍ کې د عراقي کردانو هغه پلان شوی ریفرندم یا عمومي نظرپوښتنه رد کړه چې ټاکل شوې د سپتامبر په ٢٥ وشي.
پارلمان د عراق صدراعظم ته واک ورکړی چې د عراق د یووالي لپاره له ټولو ممکنو اقداماتو نه کار واخلي.
د عراق د پارلمان غړی محمد الکاربولي وویل چې په پارلمان کې د رای اچونې پر وخت "کردي وکیلان له مجلس نه ووتل او د کردانو د عمومي نظرپوښتنې د ردولو پریکړه په اکثریت سره وشوه".
په پارلمان کې کردي وکیل مجید شینگالي د رویترز اژانس ته وویل چې کردان به دغه تصمیم ونه مني "دغه تصمیم کوم ارزښت نه لري او مونږ به عملي نه کړو".
د عراق د صدراعظم حیدر العبادي حکومت دمخه د کردانو له لورې ددغه ریفرندم ترسره کول رد کړي وو او هغه یې یو اړخیز او د اساسي قانون خلاف گڼلی و.
امریکا متحده ایالات او غربي نړۍ اندیښنه لري چې کیدای شي د سپتامبر د ٢٥ نیټې دغه رای گیري او نظرپوښتنه یو بل سیمه ییز جنجال جوړ کړي او دا کار به د اسلامي دولت د ډلې په ضد مبارزې نه پاملرنه بل لور ته واړوي.
د عراق سره یوځای ترکیه، ایران او سوریه د کردستان د آزادۍ مفکوره ردوي او اندیښنه لري چې دا جدایي کیدای شي د دوی خپلو کردي ټولنو ته پراخه شي.
د امریکا د متحده ایالاتو د بهرنیو چارو وزیر ریکس تیلرسن تیره میاشت د عراق د کردستان د مشر مسعود برزاني سره په تیلفوني خبرو کې له هغه وغوښتل چې د سپتامبر د ٢٥ له ریفرندم نه ډډه وکړي.
د امریکا د بهرنیو چارو وزارت ویلي داسې اندیښنې شته چې دغه نظرپوښتنه ښایي "له نورو مهمو اولیتونو نه" لکه داعش ته ماتې ورکولو څخه پام بل طرف ته واړوي.
کردانو د لومړنۍ نړیوالې جگړې د پای ته رسیدو وروسته د یو واحد دولت د جوړولو او د خپلواکۍ د ترلاسه کولو لپاره مبارزه پیل کړې ده.
ترکیې خبرداری ورکړی چې په کردستان کې د خپلواکۍ لپاره ریفریندم یا ټول پوښتنه به د کورنۍ جګړې د پیل سبب شي.
