د افغان حکومت اجرائيه رئیس وايي، په قطر کې د امریکا او طالب استازو ترمنځ روانو خبرو ته هم خوشبیني او هم اندېښنې شته دي.
عبدالله عبدالله د دوشنبې په ورځ د «کب پر۲۰مه» د وزیرانو شورا په غونډه کې وویل، افغانان د روانو مذاکراتو په اړه هم هیله مندي او هم داچې ځینې برخې خلکو ته روښانه نه دي اندېښنه لري.
ښاغلي عبدالله وویل چې په قطر کې د امریکايي او طالب استازو ترمنځ د روانو خبرو یوه برخه د افغان حکومت، افغان سیاسیونو او طالبانو ترمنځ مذاکراتو ته زمینه برابرول دي.
نوموړي زیاته کړه:"د افغانستان خلک له یوې خوا هیله مند او له بل اړخه چې د روانو خبرو ځینې اړخونه تر اوسه ورته روښانه نه دي خپلې اندېښنې لري."
د هغه په خبره که چیرې د افغان حکومت، افغان سیاسیونو او طالبانو ترمنځ د مخامخ مذاکراتو زمینه برابره شي د «افغانستان د اسلامي جمهوریت» له نظام څخه باید دفاع وشي او معامله ورباندې ونشي.
اجرائیه رئیس وویل، که په دې برخه کې ځینې مسايل له پامه وغورځول شي سوله نشي رامنځته کېدلی.
هغه وویل:"که چېرې ان شاءالله زمینه برابره شي، دولت او نورې ټولې سیاسي ډلې د افغانستان د اسلامي جمهوریت له نظام څخه د دفاع ګډ مسؤلیت لر، ځکه دا د افغانستان د خلکو یوه ګډه لاسته راوړنه ده."
نوموړي د سولې په روانو کې خبرو کې د طالبانو پر نیت یو ډول شک څرګند کړ او زیاته یې کړه که طالبان یو ځل بیا د تېر په څېر پر خپل موقف ودریږي چې په افغانستان کې تروریستان نشته دا نه د افغانستان خلک او نه هم نړیوال مني.
عبدالله پر داسې مهال دا څرګندونې کوي چې د تېرې فبرورۍ میاشتې له ۲۶ مې نېټې په دوحه کې د امریکايي او طالب استازو ترمنځ د پنځم پړاو مذاکراتو بشپړه جزئیات رسنیو ته نه دي راوتلي.
د مارچ پر ۶مه د امریکا بهرنیو چار وزارت ویاند رابرټ پالادینو په دوحه کې د روانو مذاکراتو په اړه ویلي و چې د دغه خبرو تمرکز پر څلورو مسلو دی چې دواړه خواوې هڅه کوي په اړه یې یوې موافقې ورسېږي.
نوموړي ویلي و چې دا څلور مسايل د تروریزم پر ضد هڅې، بین الافغاني خبرې، د امریکايي ځواکونو وتل او اوربند مسلي دي.
خو طالبانو بیا تېره جمعه وویل چې په دوحه کې پر دوو مسلو چې یو د بهرنیو ځواکونو وتل او بل دا چې افغان خاوره به د نورو هېوادونو پر ضد نه کارول کېږي مذاکرات کېږي.
دا په داسې حال کې ده چې د افغانستان د سولې عالي شورا د دارالانشاء مشر محمد عمر داودزي هم روانه میاشت وویل چې افغانان په قطر کې د بندو دروازو تر شا د روانو خبرو په اړه اندېښنه لري.
طالبان: قطر کې د سولې خبرو پر خارجي «اړخ» مذاکرات روان دي
داودزی: قطر کې د بندو دروازو تر شا خبرې افغانانو ته د اندېښنې وړ دي
امریکايي جنرال: غني له طالبانو سره زموږ له خبرو ملاتړ کوي
افغان چاوراکي پر داسې مهال په قطر کې د روانو مذاکراتو په اړه اندېښنه لري چې روانه میاشت د امریکا د ټولو ځواکونو د مرکزي قوماندانۍ مشر جوزف ووټل ویلي و چې د قطر مذاکراتو جریان له ولسمشر محمد اشرف غني سره شریک کېږي او زیاته کړې وه چې ښاغلی غني له دغو مذاکراتو ملاتړ کوي.
