د راپورونو له مخې نن سې شنبه نومبر ۳۰ (لېندۍ ۹) د کابل ښار دریمې امنیتي حوزې اړوند دارالامان پر سړک د چسپکي ماین چاودنه شوې ده.
باختر دولتيخبري آژانس د طالبانو د کورنیو چارو وزارت د ویاند قاري سعید خوستي له قوله ویلي چې چاودنه د دارلامان سړک په ګولدان کې د ځای پر ځای شوو موادو له امله رامنځته شوې ده.
هغه ویلي چې په دغه چاودنه کې چاته زیان نه دی رسېدلی.
خو په افغانستان کې ایمرجنسي روغتون ویلي چې د نننۍ چاودنې له ځای څخه د دوی روغتون ته پنځه تنه ټپيان ور وړل شوي دي.
ایمرجنسي په دې اړه نور معلومات نه دي ورکړي چې دغه چاودنه د طالب سرتیرو او که د ملکي وګړو پر موټر شوې ده.
لا د دغه برید مسئولیت چا په غاړه نه دی اخیستی. دا په تېرو څو ورځې کې پنځمه چاودنه ده چې د کابل په ښار کې کېږي. په تېرو چاودنو کې تر ډېره عام خلک وژل شوي او ژوبل شوي دي.
په کابل ښار کې د تیرو څو ورځو د چاودنو مسؤلیت د داعش ـ خراسان څانګې منلی و.
دا په داسې حال کې ده چې په کابل کې د طالبانو حکومت په دې وروستیو کې په کابل ښار کې امنیتي تدابیر زیات کړي دي.
