د پاکستاني رسنیو د راپورونو لهمخې نن یکشنبه سهار وختي د «سپټمبر پر ۲۲مه» په ګلګیت بالستان کې په یوې ټرافیکي پېښې کې ۲۶ تنه وژل شوي او ګڼ نور ټپیان شوي دي.
د فیض الله فراق په نوم د حکومت ویاند رسنیو ته ویلي، چې دغه پېښه د ګلګت بالستان په دیامر ولسوالۍ کې شوې، چې ۱۱ تنه پکې ټپيان شوي دي.
ځايي چارواکي وايي، چې د پېښې په قربانیانو کې د پاکستان د پوځ سرتېرې هم شامل دي.
هغه ویلي، چې د پېښې ټول قربانیان د یو مسافر وړونکي بس موټر سپرلۍ دي او ټپیان یې د درملنې لپاره سیمه ییزو روغتون چلاس ته انتقال شوي دي.
د پاکستان «ډان» ورځپاڼې د دامیر ولسوالۍ د پولیسو د ویاند محمد وکیل له قوله ویلي، چې دغه بس موټر د زیات سرعت له امله د موټر چلوونکي له کنټروله وتلی او له غره سره لګېدلی دی.
دغه مسافر وړونکي بس تېره شپه د سکردو په نوم سیمې څخه د راولپنډۍ په طرف حرکت پیل کړی و، چې په لاره کې له غره سره ټکر وکړ.
پاکستاني چارواکو همدارنګه ویلي، چې د ټپیانو د ژغورلو لپاره یې سیمې ته دوې هلیکوپټرې هم استولې دي.
