د امریکا د متحدو ایالتونو د بهرنیو چارو وزیر مایک پمپیو وايي چې ایران د افغان سولې د بهیر د کمزوري کولو هلې ځلې کوي.
ښاغلي پمپیو د سه شنبې په ورځ (جنوري ۷) په یو خبري کنفرانس کې وویل چې ایران د افغانستان د سولې په اړه په سیمه ییزې اجماع کې له ګډون کولو څخه ډډه کړې ده.
نوموړي وویل چې ایران له ډېر پخوا څخه په افغانستان کې د اورپکو ننګه کوي او اوس په فعال ډول هلې ځلې کوي چې د افغانستان د سولې بهیر کمزوری کړي.
د امریکا د بهرنیو چارو وزیر وویل: "ډېر خلک په عربي هېوادونو کې د ایران د نیابتي شبکو په اړه معلومات لري، خو دا رژیم همدغه راز له طالبانو، حقاني او دادالله سره هم اړیکې لري/درلودې."
ښاغلي پمپیو زیاته کړه: "د ایران په چټلو کارونو کې د طالبانو ښکېلتیا به د افغانستان د سولې بهیر ته زیان ورسوي."
ښاغلي پمپیو د جمعې په ورځ د ایران د سپاه پاسداران د قدس ځواک د قوماندان قاسم سلیماني له وژل کېدو وروسته په لمړي ځل خبریالانو ته معلومات ورکړل او جنرال سلیماني د وژلو په اړه یې د امریکا د جمهور رئیس د تصمیم ننگه وکړه.
