د کابل ښار د مکروریانو په سیمه کې د پکتیکا ولایت د صفر یک قطعې قومندان وژل شوی دی.
طالبان وايي د جمعې په شپه (جون ۲۸) یې په یو غلجکي برید کې د کابل ښار د مکروریانو په سیمه کې قومندان عزیزالله کاروان وواژه. دوی ادعا کوي چې کاروان امريکايي ځواکونو ته نژدې کس و.
د افغانستان د کورنیو چارو وزارت یوې منبع امریکا غږ ته د ښاغلي کاروان وژل کېدل تاید کړي دي.
د کابل د پولیس ویاند حشمت الله ستانکزي په خپل فیسبوک کې لیکلي دي چې د کابل ښار د مکروریانو په سیمه کې د فردوسي په پارک په یو وسله وال برید کې دوه کسان وژل شوي او درې نور ژوبل دي.
ښاغلي ستانکزي د وژل شویو او ژوبل شویو کسانو هویت ندی ښکاره کړی.
عزیزالله کاروان په پکتیکا کې د سیمه ییزو پولیسو مشر هم و چې طالبانو پرې څو وارې بریدونه کړي دي او ژوبل شوی هم دی. سیمه ییز پولیس په یو شمېر ولایتونو کې د افغان امنیتي ځواکونو سره په ګډه د وسله والو طالبانو په وړاندې جنګیږي.
د سیاسي چارو شننونکي شفیق همدم په خپل ټویټر کې لیکلي دي چې د برید پر مهال د پېښې په ځای کې و.
په ده باندې په ۲۰۱۴ کال کې ځانمرګی برید هم شوی و چې سخت ژوبل شوی و.
داسې ښکاري چې دی طالبانو ته ډېر مطلوب کس و چې بلاخره یې په کابل کې په نښه کړ. طالبان معمولآ په کابل کې ځانمرګي او ډله ییز بریدونه کوي مګر د غلجکیو او هدفي بریدونو دا لړۍ یې هم نوې نه ده.
