د هند په مانیپور ایالت کې پولیسو ويلي چې اورپکو پر امنیتي ځواکونو باندې د بې پیلوټه الوتکو په واسطه بمونه غورځولي، یوه ښځه وژل شوې او لږ تر لږه شپږ تنه ژوبل دي.
پولیسو د یکشبنې سپتمبر اوله (وږي ۱۱) برید په مانیپور کې، چې د هندوانو او عیسوي لږکیو ترمنځ د فرقهيي تاوتریخوالي سره مخامخ دی، "بې ساری" او په ناامنیو کې "د پام وړ زیاتوالی" بللی دی.
د هند په شمال ختیځ کې د میانمار پولې ته څېرمه دغه ناارامه ایالت کې د "میتي" په نوم هندوانو د ډلې او "کوکي" په نوم عیسوي لږکیو ترمنځ تاوتریخوالی د ۲۰۲۳ په مۍ کې پیل شوی او تراوسه له ۲۰۰ ډیر کسان پکې وژل شوي دي.
مخالفو فرقه يي ډلو د ایالت په مختلفو برخو کې پاټکونه جوړ کړي دي.
دواړه خواوې له یو بل سره د ځمکو د ملکیت او دولتي دندو پر سر اختلاف لري. پر ځايي مشرانو تور دی چې د خپلو سیاسي ګټو لپاره دغو اختلافونو ته لمن وهي.
د مانیپور پولیسو د یکشنبې په ورځ په یو بیان کې وویل: "که څه هم ډرونونه په عامو جګړو کې استعمالیږي، خو پر امنیتي ځواکونو او عامو خلکو باندې د ډرونونو په وسطه د چاودېدونو موادو غورځول د تشدد په پېښو کې د پام وړ زیاتوالی ښيي."
د پولیسو په بیان کې د برید پړه پر "شکمنو کوکي لږکیو" اچول شوې.
په زخمیانو کې د وژل شوې مېرمنې یوه اته کلنه لور، درې نور ملکي خلک او دوه پولیس شامل دي.
پولیسو همدارنګه ویلي چې په برید کې "په لوړه کچه د روزل شویو مسلکي او تخنیکي کسانو" لاس لرل نه ردوي.
فورم \ دبحث خونه