د باختر خبري اژانس چې د طالبانو د حکومت له خوا اداره کیږي راپور ورکړی دی، چې د طالبانو د استخباراتو ځانګړو ځواکونو د کابل ښار په ختیځ کې د بګرامیو د ولسوالۍ د میرویس په ښار ګوټې کې د داعش د وسله والو په یو مرکز باندې عملیات کړي دي.
طالبانو ته نږدې سرچینو خبریالانو ته ویلي، چې دا عملیات تیره شپې ناوخته پیل شوي او د یکشنبې د ورځې تر سهار جولای ۱۶ (چنګاښ ۲۵) پورې یې دوام درلود.
دغو سرچینو په دې عملیاتو کې تر دوو تنو پورې د داعش د وسله والو د وژل کیدو خبر ورکړی او ویلي دي، چې په دې عملیاتو کې د طالبانو ځواکونو ته د سر زیان نه دی رسیدلی.
ددغو سرچینو د معلوماتو له مخې د داعش دغه مرکز د څه مودې راهیسې د طالبانو د امنیتي ځواکونو تر څارنې لاندې و.
تراوسه د طالبانو امنیتي ادارو په رسمي ډول ددغو عملیاتو جزئیات رسنیو سره نه دي شریک کړي.
په کابل کې د داعش د ډلې د وسله والو په خلاف دا عملیات وروسته له هغه شوي، چې د ځینو راپورونو له مخې د داعش ډلې د کابل په هوايي ډګر کې په امریکايي ځواکونو باندې د خونړي برید د طراح ابو سعد محمد خراساني "ضیاالدین اکا" وژل کیدل تائید کړي دي.
د ۲۰۲۱ کال د اګسټ په ۲۷ د کابل په هوايي ډګر باندې د داعش په برید کې لږترلږه ۱۳ امریکايي سرتیرو په ګډون په لسګونو افغانان وژل شوي او یو شمیر نور ټپیان شوي و.
د امریکا متحده ایالاتو د روان ۲۰۲۳ کال د اپریل په وروستۍ اونۍ کې د طالبانو په عملیاتو کې د ابو سعد محمد خراساني وژل اعلان کړي و. خو هغه مهال داعش له خوا د خپل دغه لوړپوړې قوماندان وژل نه و تائید شوي.