د اسرائیل پوځ دوشنبه فبروري ۱۲ (سلواغې ۲۳) د غزې رفح سیمې څخه دوه یرغمل شوي کسان ژغورلي خو په همدې سیمې باندي په هوایي بمباریو کې لږ تر لږه ۶۷ فلسطینیان وژلي دي.
د اسرائیل پوځ او د پولیسو ځانګړې قطعې ویلي چې ژغورل شوي یرغمل فرناندو سیمان مارمان او لیوس هار نومیدل چې په ترتیب سره ۶۰ او ۷۰ کلن دي. دوي د اسرائیل سربیره د ارجنټاین تابعیتونه هم درلودل.
د اسرائیل صدراعظم بنجامین نیتن یاهو د دې یرغملو کسانو د ژغورلو عملیات ستایلي او د رفح په سیمې کې د اسرائیلي ځواکونو د عملیاتو په هکله د نړیوالې ټولنې اعتراضونه یې هم برد کړیدي.
نیتن یاهو دې دواړو ژغورل شویو یرغملو ته هرکلی ویلی او تر څنګ یې دا هم ویلي چې " یوازې دوامدار نظامي فشار به د ټولو یرغمل شویو کسانو د خوشې کیدو سبب شي".
د اسرائیل د پوځ یو ویاند ویلي چې دا یرغمل شوي کسان د یوې ودانۍ په دویم پړاو کې ساتل کیدل چې د ژغورنې عملیاتو پر وخت چاودنې هم پکې شوي او د وسله والو سره چې دا ودانۍ یې کلا بنده کړې وې، ډزې هم تبادله شوې.
ډګروال رچارډ هیچت د دې عملیاتو په هکله وویل، "مونږ پدې عملیاتو له ډیر وخت راهیسې کار کاوه او د مناسبو شرایطو انتظار مو ایست".
په عین حال کې د غزې عامې روغتیا وزارت چې کنټرول یې د حماس په لاس کې دی ویلي چې ښایي د اسرائيل د ژغورنې پدې عملیاتو کې د وژل شویو کسانو شمیر لوړ شي ځکه چې عملیات لا هم روان دي.
د رویټرز خبري اژانس یو خبریال چې د عملیاتو پر وخت په سیمه کې و، ویلي چې د یو جومات په ګډون ګڼ شمیر ودانۍ ړنګې شویدي.
د ابراهیم حسونا په نامه یوه میرمن چې خپل خپلوان یې د اسرئیل په هوایي بریدونو کې وژل شوي و او د یو واړه ماشوم په مړي یې سر ایښی و وویل، " د سهار راهیسي د کورنۍ د بدنونو ټوټې راټولوم. زه هغوي یوازې د پښو او لاسونو د ګوتو څخه پیژنم".
سره له دې چې د ملګرو ملتونو په ګډون نړیوالې ټولنې او متحده ایالاتو د رفح په سیمې کې د اسرائیل د عملیاتو په هکله اندیښنه څرګنده کړې او دا هم ویل شوي چې که دا عملیات په سمه توګه تنظیم نشي، د ناورین سبب به شي خو د اسرائیل صدراعظم وویل چې دا عملیات به کوي.
د اټکل له مخې د رفح په سیمې کې ۱.۳ ملیون فلسطینیانو د غزې نورو سیمو کې د جګړو څخه د بچ کیدو په خاطر پناه اخیستې او څرګنده نده چې دا بې ځایه شوي فلسطینیان به چیرته ولاړ شي.
د بې پولې ډاکټرانو خیریه مؤسسې عمومي مشرې میني نیکولای د دوشنبې په ورځ د اسرائیل څخه غوښتي چې د رفح په سیمې کې تعرضي عملیات بند کړي په نورو هیوادونو یې غږ کړی چې په غزې کې د دوامدار اوربند لپاره دې کوټلي ګامونه واخلي.
میرمن نیکولای په یوې اعلامیې کې ویلي، " په غزې کې هیڅ ځای خوندی ندی او په زوره په پرله پسې توګه د خلکو بې ځایه کیدو هغوي د رفح خوا راتګ ته اړ کړي. هغوي دلته په یو واړه ځای کې ګیر پاتې دي او هیڅ بله لار نلري".
د متحده ایالاتو ولسمشر جو بایډن د یکشنبې په ورځ یو ځل بیا د اسرائیل د صدراعظم سره په ټیلیفون کې خبرې کړیدي.
سپینې ماڼۍ د دې خبرو په هکله په یوې اعلامیې کې ویلي چې ښاغلي بایډن د اسرائیل مشر څخه غوښتي چې که د رفح سیمې څخه په خوندي توګه د ملکي وګړو د وتلو لپاره "اعتباري او د اجرا وړ" پلان ډاډ نه وي ورکړل شوی، اسرائیل دې هلته نظامي عملیات نکوي.
په اعلامیې کې دا ندي ویل شوي چې آیا د اسرائیل مشر د ښاغلي بایډن دې غوښتنې په ځواب کې څه ویلي دي.
د ملګرو ملتونو عمومي منشي انتونیو ګوتریش هم ویلي که د اسرائیل دفاعي ځواکونه د رفح په سیمې کې عملیات وکړي، د "ستر ناورین" خطر پیښولی شي.