د کرکټ په نړیوال جام کې د پنجشنبې په ورځ اکتوبر ۱۹ (تلې ۲۷) کوربه هند بنګله دېش ته د اوو ویکټو په توپیر ماتې ورکړه.
بنګله دېش د دغې ۵۰ اوریزې لوبې د پچې له ګټلو وروسته د توپ وهلو پرېکړه وکړو.
بنګله دېش د اتو لوبغاړو په سوځېدو مخالف لوري ته د ۲۵۷ منډو هدف وټاکه. د هند ټیم وتوانېد چې په ۴۲ اورونو کې د یوازې دریو لوبغاړو په سوځېدو دغه هدف پوره کړي.
د هند نامتو لوبغاړي ویرات کوهلي په دغه لوبه کې ۱۰۳ منډې وکړې، تر پایه ونه سوځېد او د لوبې غوره لوبغاړی ونومول شو.
کوهلي په دغه لوبه کې د شپږ کلونو وروسته په لومړي ځل توپ اچونه هم وکړه. هغه د کارډیک پانډیا له زخمي کېدو وروسته د هغه نیم پاتې اوور بشپړ کړ او په درې توپونو کې یې بنګله دیش وتوانېد چې یوازې دوه منډې وکړي.
دا مطلب هم ولولئ کوهلي تیرو شپږو کلونو کې په لومړي ځل توپ اچونه وکړه
د هند شوبمن ګېل ۵۳ او کپتان روهیت شرما ۴۸ منډې وکړې. د هند د توپ اچونې په برخه کې راویندرا جدیجا، جسپریت بومرا او محمد سراج دوه-دوه لوبغاړي وسوځول.
د بنګله دېش دپاره لینتن داس تر ټولو زیاتې منډې وکړې. هغه په ۸۲ توپونو د ۶۶ منډو کولو وروسته وسوځېد. د بنګله دېش تنزید حسن ۵۱ او محمدالله ۴۶ منډې وکړې.
د بنګله دېش توپ اچوونکي مهدي حسن په لسو اوورونو کې ۴۷ منډې وکړې او د هند دوه لوبغاړي یې وسوځول.
په نړیوال جام کې سبا پاکستان او استرالیا لوبه کوي. په دغه جام کې د افغانستان راتلونکې لوبه د دوشنبې په ورځ له پاکستان سره ده.