په داسې حال کې چې د غزې د سولې خبرې ټکنۍ شوې، د متحدو ایالتونو ولسمشر جوبایډن د اسرائیل په صدر اعظم بینیامین نتنیاهو باندې فشار راوړی چې له حماس سره په اوربند کې توافق ته ورسېږي.
د دواړو هېوادونو مشرانو له هغه څو ساعته وروسته خبرې وکړې چې د متحدو ایالتونو د بهرنیو چارو وزیر انتوني بلینکن د اوربند په اړه منځني ختیځ ته خپل څلور ورځنی سفر پای ته ورسوه او بېرته واشنګټن ته راستون شو.
جوبایډن د جهارشنبې په ورځ اګست ۲۱ (سنبله لومړی) د خپل ایکس په رسمي حساب کې لیکلي چې «موږ دا خبره واضحه کړه چې باید د اوربند او یرغمل شویو د خلاصون معامله ختمه کړو او د قاهره په راتلونکو مذاکراتو مو بحث وکړ چې پاتې خنډونه لېرې» کړو.
نوموړي همدغه راز د اسرائيل صدراعظم ته «د ایران او د هغه د نیابتي ترهګرو ډلو د ګواښونو په وړاندې د اسرائيل د دفاع په اړه د متحدو ایالتونو د هڅو» په اړه معلومات ورکړل.
Today I spoke with Prime Minister Netanyahu regarding U.S. efforts to support Israel’s defense against threats from Iran and its proxy terrorist groups.I again made clear that we must bring the ceasefire and hostage release deal to closure and discussed upcoming talks in Cairo…
— President Biden (@POTUS) August 21, 2024
سپینې ماڼۍ په یوې جلا اعلامیې کې ویلي دي چې ولسمشر اوربند ته د رسېدو «په اړتیا ټېنګار» کړی دی. په اعلامیې کې ویل شوي دي چې په دغو تیلیفوني خبرو کې د امریکا د ولسمشر مرستیاله کاملا هریس هم وه.
متحده ایالتونه، مصر او قطر د اسرائیل او حماس ترمنځ د خبرو منځکړتوب کوي. د «Axios» رسنۍ راپور ورکړی چې ولسمشر بایډن نتنیاهو ته ویلي وو چې په خبرو کې نرمي وښيي. دغې رسنۍ همدغه راز ویلي دي چې د امریکا ولسمشر به د اسرائیل لپاره د فیلادیلفي دهلیز د کنترول په غوښتنې تمرکز کوي، دا سرحد د غزې او مصر ترمنځ دی چې اسرائيل له حماس څخه نیولی دی.
اسرائيل وايي چې حماس د وسلو د انتقال لپاره له تونلونو څخه کار اخلي. بایډن په اسرائيل باندې د حماس د اکتوبر د اوومې نېټې له بریدونو وروسته د اسرائيل کلکه ننګه کړې او پوځي مرستې یې ورسره کړې چې د نتنیاهو په وینا هدف یې د حماس ډلې ختمول دي.
خو د امریکا او د اسرائيل د مشرانو ترمنځ روابط څه ناڅه کړکیچن شوي دي، بایډن له اسرائيل څخه غواړي د ولسي تلفاتو مخه ونیسي.
د اسرائيل مقامات وايي چې د حماس په بریدونو کې ۱۱۹۹ کسان وژل شوي چې اکثریت یې ولسي خلک دي. د اسرائيل په غچ اخیستونکو بریدونو کې بیا تر دې دمه د حماس تر کنترول لاندې د غزې د روغتیا د مقاماتو په وینا ۴۰۲۲۳ کسان وژل شوي، دوی د ولسي او پوځي خلکو ارقام نه دي ښودلي.
د حماس ډلې همدغه راز ۲۵۱ کسان هم یرغمل ونیول چې لا یې هم ۱۰۵ تنه په غزې کې ساتل کېږي، د اسرائيل پوځ وايي ۳۴ یرغمل مړه شوي دي. د ملګرو ملتونو د بشري حقونو اداره وايي چې اکثریت وژل شوي ښځې او ماشومان دي.