د افغان سولې لپاره د امریکا د بهرنیو چارو وزارت ځانګړی استازی زلمی خلیلزاد له پاکستاني چارواکو سره پر افغان سولې د بحث لپاره نن پاکستان ته رسېدلی دی.
د پاکستان د بهرنیو چارو وزارت نن جمعه په یوې اعلامیې کې ویلي چې ښاغلي خلیلزاد په بهرنیو چارو وزارت کې له شاه محمود قریشي سره وکتل.
په دغه کتنه کې دواړو لورو د افغان سولې په اړه د روانو هلو ځلو سیمه ییز سولې او ثبات په اړه خبرې کړي دي.
بیان وايي چې خلیلزاد قریشي ته په قطر کې د امریکايي او طالب استازو ترمنځ د خبرو په اړه معلومات ورکړل او د افغان سولې په بهیر کې د پاکستان رول وستایه.
په دغه اعلامیه کې د پاکستان د بهرنیو چارو د وزیر شاه محمود قریشي له قوله ویل شوي:"د امریکا او طالبانو ترمنځ د سولې هوکړه لیک به بین الافغاني مذاکراتو ته لار پرانیزي چې دا به نه یوازې افغانستان کې بلکې په ټوله سیمه کې د ثبات لپاه تاثیر واچوي."
نن یوې پاکستانۍ سرچینې امریکا غږ ته وویل چې ټاکل شوې ښاغلی خلیلزاد د پاکستان له ملکي او پوځي چارواکو سره د افغان سولې پر بهیر وغږیږي.
ډاکټر زلمی خلیلزاد له یوې میاشتې راپدېخوا په قطر کې له طالب استازو سره د سولې په خبرو بوخت و چې روانه پر یاد بهیر د بحث لپاره د ناټو د غړو هیوادونو سره د لیدنې لپاره بروکسل ته هم تللی و.
که څه هم تر دا مهاله په دوحه کې د امریکايي او طالب استازو د روانو خبرو جزئیات رسنیز شوي نه دی، خو تر دې مخکې له یادو مذاکراتو باخبره سرچینو ویلي و چې دواړه لوري په افغاناسستان کې د تاوتریخوالي پر کمولو، اوربند او بین الافغاني خبرو ته د زمینې پر برابرولو باندې خبرې کوي.
د طالبانو د قطر دفتر ویاند سهیل شاهین روانه میاشت ویلي و چې طالب او امریکايي استازي د توافقنامې د لاسلیک مراسمو اړوند نورو مسائلو باندې خبرې کوي.
د افغانستان حکومت بیا د تاوتریخوالي د طرحې عملي کول بې نتیجې بولي اوسولې ته د رسېدو لپاره پر اوربند د لومړي شرط په توګه ټینګار کوي.
خلیلزاد پر داسې مهال د افغان سولې اړه په د سیمې هیوادونو ته سفر کوي چې افغان سیاسیونو له طالبانو سره د سولې خبرو په اړه د یوې طرحې پر جوړولو هم کار پیل کړی دی.
یادو سیاسیونو روانه اونۍ په کابل کې د سیاسي او جهادي مشر محمد محقق په کور کې یوه غونډه هم کړې وه.
