ملگرو ملتونو په کال ١٩٧٥ کې د مارچ اتمه نیټه په لمړي ځل د د ښځو د حقونو د ورځ په توگه وټاکله خو د ښځو ورځ د سلو کلونو نه زیات زوړ تاریخ لري
د نړۍ په بیل بیل ملکونو کې هر کال د اتم مارچ ورځ د ښځو د حقونو او د هغو د کامیابیو د پیژندگلو لپاره لمانځل کیږي. دغه ورځ د ملک، مذهب، قوم، رنگ، نسل او سیاسي فکر پرته د ټولو میرمنو د مساوي حقونو لپاره لمانځل کیږي.
د ښځو د ورځې لمانځنه د نولسمې پیړۍ په اخیره او د شلمۍ پیړۍ په لمړیو کلونو کې د کارگرو د تحریک په نتیجه کې پیل شوه.
د شلمې پیړۍ په پیل کې دغه ورځ په لمړني ځل په امریکا کې د ١٩٠٩ کال د فرورۍ په ٢٨ د سوشلسټ گوند لخوا د هغو کارگرو ښځو په حق کې ولمانځل شوه چې په ١٩٠٨کال کې یې د کار پر ځاې کې د خراب وضعیت له کبله مظاهرې کړې وی.
ځینې منابع دا هم وایي چې د ١٩٠٨ کال د نیویارک ښار په دغې مظاهرې کې چې پکې ١٥ زرو پورې ښځو گډون کړی و، د راې اچونې د حق غوښتنه وکړه.
د ملگرو ملتونو یوه مقاله لیکي چې د کال ١٩١٣ او کال ١٩١۴ کې د ښځو دغه ورځ په ټوله نړۍ کې د حقونو غوښتنې لپاره وټاکل شوه او په مختلفو ملکونو چې پکې امریکا او اروپا شامل دي، مظاهرې وشوی.
په کال ١٩١٧ کې د مارچ په اتمه نیټه په روسیې کې ښځو د جنگ ضد مظاهرې وکړی.
د نړیوال لمړي او بیا دوهم جنگ نه وروسته په غربي ملکونو او په خاصه توگه په امریکا کې ښځو د مساوي حقونو لپاره مبارزې پیل کړې وي او په دغه لړ کې یې ډیرې کامیابۍ وموندلی.
ملگرو ملتونو د ١٩٧٥ کال د ښځو مبارزې، حقونو او د هغوي کامیابیو ته مختصص کړ. همدغه کال ملگرو ملتونو پریکړه وکړه چې د مارچ اتمه به هر کال د ښځو د کامیابیو د پیژندگلو لپاره لمانځي.
دغه ورځ په افغانستان او پاکستان کې لا هم په دی تمه لامانځل کیږي چې د هرې سیمې ښځې د انسان په توگه اساسي حقونو ته لاسرسې ولري، نورې د تعلیم نه محرومه پاتې نه شي او د غیرت او ناموس قرباني نه شي.
