د روغتیا نړیوال سازمان د یکشنبې په ورځ، جنوري ۲۶ (سلواغې اووم) وویل چې د سودان په لویدیځ کې د الفاشر په محاصره شوي ښار کې د سعودي عربستان پر یو روغتون باندې برید شوی او ۷۰ تنه په کې وژل شوي دي.
د دغه سازمان مشر تدروس ادهانو ګبریسوس د ایکس پر ټولنیزې شبکه کې لیکلي چې دي چې په دې برید کې ۱۹ تنه نور ټپیان شوي دي. هغه زیاته کړې ده چې د برید پر مهال روغتون له ناروغانو څخه ډک و.
سعودي عربستان په یو بیان کې په روغتون باندې برید غندلی دی او هغه یې "له نړیوالو او بشري قوانینو څخه سرغړونه بللې" او د روغتیايي او بشري فعالانو د خوندیتوب تر څنګ یې پر غیرنظامي اهدافو باندې د برید د مخنیوي غوښتنه کړې ده.
په سودان کې د چټک غبرګون د ملاتړ وسلهوالې ډلې د سیاسي برخلیک معلومولو او د دې هېود په ملي اردو کې د مدغم کېدو په تړاو له څو میاشتو لانجو وروسته، د سودان د نظامي مشر عبدالفتاح البرهان او د هغه د مرستیال محمد حمدان داګالو، چې د چټک غبرګون د ملاتړې ډلې مشري کوي ترمنځ جنګ د ۲۰۲۳ کال د اپریل له ۱۵ راهیسې روان دی.
تر اوسه څرګنده نه ده چې دا برید کوم لوري کړی دی.
د چټک غبرګون ملاتړې ډلې د تېر عیسوي کال د مۍ له میاشتې راهیسې د شمالي دارفور مرکز محاصره کړی خو تر اوسه د دې سیمې په نیولو بریالۍ شوې نه ده.
د سودان په جنګ کې لسګونه زره کسان وژل شوي دي او څه باندې ۱۲ میلیونه وګړي له خپلو سیمو بېځایه شوي دي.
د دې هېواد په ځینو برخو کې په ځانګړې توګه په لویدیځ او جنوب کې قحطي خلک ځپلي دي او یو شمېر کورنۍ یې اړ کړي چې د ژوندي پاتې کېدو لپاره واښه وخوري.
فورم \ دبحث خونه