په سودان کې سیمه ایزو فعالینو یکشنبه ډسمبر ۱۵ ( لیندۍ ۲۵) ویلي چې د ملیشو د بې پیلوټه یا ډرون الوتکو په بریدونو کې چې د دارفور په لویدیځه برخه کې کړي، لږ تر لږه ۳۸ تنه وژل شویدي.
د شمالي دارفور ایالت په مرکز الفاشر کې د سیمه ایزې دفاع کمیټې په نامه فعالینو ویلي چې د چټک ملاتړ ځواکونو ملیشو د دې ښار په مرکز څلور توغندي وار کړي چې په لوړه کچه چاودیدونکي مواد پکې کارول شوي و.
دا کمیټه د هغو سلګونو رضاکارو فعالینو څخه یوه ده چې په ټول سودان کې د مرستندویه موادو ویشلو چارې سمبالوي.
د RSF ملیشې چې د ۲۰۲۳ میلادي کال د اپریل میاشتې راهیسې د سودان ملي پوځ سره په جګړه اخته دي، د روان میلادي کال د مې میاشتې راپدیخوا یې د الفاشر ښار کلابند کړیدی.
دواړو خواوو د ډارفور سیمې باندې د کنټرول لپاره شدیدې جګړې کړیدي.
د چټک ملاتړ ځواکونو ملیشې اوس مهال تقریباً د ټول ډارفور کنټرول په لاس کې لري، دوي همدارنګه په جنوب کې د کوردافان او سودان مرکزي سیمې نیولي دي خو د شمال او ختیځو برخو کنټرول بیا د پوځ په لاس کې دی.
خو راپورونه وایي چې اوس دواړه ډلې د پایتخت خرطوم او الفاشم د بشپړ کنټرول تر لاسه کولو لپاره جګړې کوي.
په عین حال کې د سودان عامې روغتیا وزارت چې د پوځ سره اړیکې لري، ویلي دي چې د ملیشو د بې پیلوټه الوتکې یو بل برید کې چې د الفاشر په عمومي روغتون باندې یې کړی، لږ تر لږه ۹ تنه وژلي او ۲۰ نور یې ټپي کړیدي.
په سودان کې د تیر کال د اپریل له پنځمې نېټې را وروسته د پوځ او د "چټک ملاتړ ځواک" د غړو ترمنځ جګړه روانه ده او د ورکړل شویو معلوماتو او موجوده ارقامو پر بنسټ، تر دې دمه شاوخوا ۵۰۰۰ خلک په کې وژل شوي دي.
د پوځ لوی درستیز جنرال عبدالفتاح برهان او د چټک ملاتړ ځواکونو په نامه ملیشو مشر جنرال حمدان داګلو په دې کې ناکام شول چې دا ملیشې د سودان په ملي پوځ کې شامل کړي.
د ملګرو ملتونو د شمېرو له مخې، په دې کورنۍ جګړې کې تر اوسه زرګونه خلک وژل شوي، ۱.۶ میلیون وګړي اړ شوي چې خپل کور کلی پریږدي او نورو سیمو ته کډه شي او نږدې ۲۵ میلیونه نور چې ددې هیواد نیمایي نفوس څخه ډیر دي، بشري مرستو ته اړتیا لري.
فورم \ دبحث خونه