په افغانستان کې د داعش د خراسان څانګې د فعالیتونو د پراخېدو او شتون په اړه د اندیښو په زیاتیدو سره هم مهاله د امریکا دفاع وزارت ویلي چې طالبان د داعش پر وړاندې مبارزه کې د امریکا د نړیوال ایتلاف برخه ندي.
د امریکا د دفاع وزارت د ویاند مرستیالې سبرینا سنګ د پنجشنبې په ورځ (اګست ۲۲) خبریالانو ته وویل چې امریکا د داعش د ماتولو لپاره نړیوال ایتلاف لري او د طالبانو ډله ددې ایتلاف برخه نه ده.
سینګ په دې اړه د یو خبریال د پوښتنې په ځواب کې وویل، "متحده ایالات د همفکره شریکانو او متحدینو سره د داعش د ماتولو د ډاډمن کیدو لپآره همکاري کوي."
تر دې مخکې د ملګرو ملتونو د بندیزونو د څار ډلې د جولای په لسمه (چنګاښ ۲۰) د یو راپور په خپرولو سره خبرداری ورکړی و چې د القاعده او اسلامي دولت یا داعش په څېر د ترهګرو ډلو په شتون سره به افغانستان تقریباً د ناامنۍ سرچینه پاتې شي.
په دغه راپور کې خبرداری ورکړل شوی، چې دغه ډلې به د طالبانو له کمزورتیا څخه په ګټې اخیستو سره خوندي پټنځایونه او یا داسې لارې ومومي چې د ناامنۍ سبب شي او دغه ډلې افغانستان ځان ته "امن یا دوسته سیمه" ګڼي.
په راپور کې راغلي چې "د افغانستان په یوشمېر ولایتونو کې د مېشتو ترهګرو ډلو پر وړاندې د طالبانو پرله پسې زغم ګاونډیو هېوادونو ته د ترهګرو د نفوذ لپاره شرایط رامنځته کوي".
دغه راز د امریکا د بهرنیو چارو وزارت په وروستۍ مورد کې په افغانستان کې د داعش د خراسان څانګې د فعالیتونو د پراخیدو او شتون په اړه اندیښنه څرګنده کړې او ویلي یې دي چې دغه ډله پر نړیوالو اهدافو د تروریستي بریدونو د ترسره کولو لیوالتیا او وړتیا لري.
د امریکا د بهرنیو چارو وزارتد ویاند مرستیال ویدانت پټل د اګست په لومړۍ نیټه (زمري ۱۱) په یوه خبري غونډه کې په افغانستان کې د ترهګرو ډلو د شتون په اړه د یو خبریال د پوښتنې په ځواب کې وویل، واشنګټن هڅه کوي تر څو ډاډمن شي چې له افغانستان څخه په متحده ایالاتو او متحدینو باندې یې تروریستي بریدونه نه کیږي.
پنتاګون: طالبان د داعش پر ضد جګړه کې د امریکا د همکارانو په ډله کې نه دي
فورم \ دبحث خونه