د امریکا د دفاع وزیر جیم مټیس وایي افغانستان ته د اضافي امریکایي عسکرو امر یې لاسلیک کړی او نور جزیات به راتلونکې اوونۍ کانګریس ته د خبر ورکولو نه وروسته د عامو خلکو سره شریک کړي.
امریکا اوس مهال په افغانستان کې شاوخوا یوولس زره عسکر لري او ښایي چې د څلورو زرو په شاوخوا کې به نور هم واستوي او د ټولو امریکایي عسکرو شمیر به پنځلسو زرو ته ورسیږي.
د دفاع وزیر جیم مټیس چې د پنجشنبې په ورځ (اګست -۳۱) یې په پنټاګان کې خبریالانو ته معلومات ورکول، وویل چې اضافي امریکایي عسکر به تر ډیره حده افغان امنیتي ځواکونو ته د سلا مشورې ورکولو نقش ولري او د طالبانو او نورو وسله والو ډلو سره په جګړې کې به د هغوي وړتیا زیاته کړي.
ښاغلي مټیس وویل چې افغانستان ته یې د ځینو عسکرو د لیږلو امر بشپړ کړی او پدې کار روان دی چې نور کوم عسکر افغانستان ته واستول شي. پخوا داسې ویل کیده چې امریکا په افغانستان کې ۸ زره ۴ سوه عسکر لري خو پنټاګان اوس ومنله چې د ټولو امریکایي عسکرو شمیر د ۱۱ زرو په شاوخوا کې دی.
د امریکا جمهور رئیس ډونالډ ټرمپ د افغانستان او جنوبي آسیا لپاره د متحده ایالاتو د نوې تګلارې د اعلان پر وخت ویلي و چې " امریکایي عسکر به په افغانستان کې پاتې شي خو د هغوي تګلاره به بدله شي."
ښاغلي ټرمپ همدارنګه ویلي و چې په افغانستان کې د امریکا عسکرو د پاتې کیدو د پاره وخت نه ټاکي بلکه د جګړې په میدان کې شرایطو ته په کتو به هلته پاتې وي.
