وروسته له هغې چې متحده ایالاتو، اسرائیل او بریتانیا ایران په اسرائیلي کښتۍ باندې په برید تورن کړ، تهران وویل چې ددې هیواد د امنیت په ضد هر ډول بهرنۍ کواښ ته به سمدستي ځواب ورکړي.
تهران همداشان د "مرسر ستریټ" په نامه د تیلو په کښتۍ باندې په برید کې لاس درلودل رد کړل چې د تیرې پنجشنبې په ورځ د عمان په سواحلو کې ډرون الوتکې په نښه کړه او په کې د کښتۍ دوه تنه عمله –یو بریتانوی او یو رومانیایی– ووژل شول.
د بریتانیا صدراعظم بوریس جانسن، نن د اګست په دوهمه (زمري ۱۱) وویل چې ایران باید په اسرائیلي کښتۍ باندې ددې "نه منونکي او ظالمانه" برید د عواقبو سره مخامخ شي.
متحده ایالاتو او بریتانیا پرون وویل چې د خپلو متحدینو سره کار کوي چې دغه برید ته ځواب ورکړل شي.
ددې برید په ارتباط نن د اګست په دوهمه (زمري ۱۱) بریتانیا خپل سفیر له ایران څخه وروغوښت. په ځواب کې یې ایران د بریتانیا شارژدافیر احضار کړ.
د ایران د بهرنیو چارو وزارت ویاند سعید خطیبزاده، وویل چې تهران د خپل امنیت او ملي ګټو د ساتلو لپاره هر ډول "احتمالي ماجراجويی ته به سمدستي او په بوره قوت او جدیت ځواب ووایي".
هغه زیاته کړه چې د بریتانیا د بهرنیو چارو د وزیر تورونه چې د متحده ایالاتو د بهرنیو چارو وزیر هم هغه تکرار کړي، "متناقض مطالب لري، واهي او لمڅونکي تورونه دي".
د امریکا د بهرنیو چارو وزیر انتوني بلینکن، د یکشنبې په ورځ اګست دوهمه د یو بیان په خپرولو سره وویل: "د ترلاسه شویو اطلاعاتو له ارزونې وروسته ډاډمن یو چې دغه برید ایران کړی دی."
د بریتاینا د بهرنیو چارو وزیر ډامینیک راب، هم د یو بیان په خپرولو سره ویلي: "باور لرک چې دغه برید عمدي، حساب شوی او د نړیوالو قوانینو څرګند تیری د ایران له لورې و."
د اسرائیل صدراعظم نفتالي بنیت، تهران پدې برید تورن کړی او د ایران انکار یې یو "ډارن" عمل ګڼلی دی.
د اسرائیل د بهرنیو چارو وزیر ویلي چې د ایران څخه به غچ واخلي.
ددې برید مسولیت تر اوسه چا ندی منلی، خو ایران او د هغه متحدو ملیشه ډلو پخوا د ډرون بې پیلوټّ الوتکو څخه په استفادې دا ډول بریدونه ترسره کړي دي.