آن اتباع خارجی که خود را به یک مؤسسه بین المللی منسوب می کردند، بخاطری توقیف شده بودند که شناسنامه ها، جواز نامه ها و اسناد لازم نداشتند.
طالبان وایي هغه بهرني اتباع چې ویل یې په افغانستان کې د نړیوالو مؤسسو سره کار کوي د لازمو اسنادو او پیژند پاڼو نه لرلو په خاطر توقیف شوي و خو وروسته خوشې شول.
د طالبانو ویاند ذبیح الله مجاهد پدې هکله ویلي، "هغوي په ښه حالت کې و. د خپلو کورنیو سره په اړیکه کې و. وروسته تر هغه چې هویت یې تثبیت او ډاډ تر لاسه شو، خوشې شول".
jتر دې وړاندې د مهاجرینو لپاره د ملګرو ملتونو عالي کمیشنرۍ ویلي و چې دوه بهرني خبریالان چې ددې نړیوالې ادارې لپاره یې کار کاوه په کابل کې د څو تنو افغان همکارانو سره نیول شوي و.
UNHCR د موضوع په هکله په ټویټر کې لیکلي چې دا کسان نن جمعه فبروري ۱۱ (سلواغلې ۲۲) نیول شوي.
په اعلامیې کې ویل شوي، "مونږ د نورو سره په همغږۍ د ستونزې د حل لپاره نهایي هڅې کوو". په اعلامیې کې نور جزیات ندي ورکړل شوي چې نیول شوي خبریالان د کوم هیواد اتباع دي او ولې نیول شوي.
په همدې حال کې د طالبانو د ملي امنیت ریاست هم ویلي چې د موضوع په هکله هیڅ معلومات نلري.
د دې ریاست ویاند خلیل همراز ویلي، "د هغوي په هکله هیڅ معلومات نلرو چې چیرته او څه وخت بې درکه شوي. مونږ ته لا هیڅ معلومات ندي راغلي. مونږ د معلوماتو په لټه کې یو".
دغه طالب چارواکي همدرانګه ویلي چې د ملي امنیت ریاست موضوع په هکله د کورنیو چارو د وزارت سره په اړیکه کې دی.
تر اوسه نده معلومه چې دغه کسان د طالبانو کومې ادارې او ولې نیولي دي.
د تیر کال د اګست د میاشتې راهیسې چې طالبان په افغانستان کې واک ته رسیدلي، د مخالفینو د ځپلو په هکله هم اندیښنې ډیرې شوي. طالبانو څو ځله افغان خبریالان، میرمنې او د بشري حقونو مدافعین ونیول او یو شیمر ښځینه فعالانې لا هم بې درکه دي.
د ملګرو ملتونو دا خبریالان او افغان همکاران یې پداسې حال کې نیول کیږي چې د بې پولې خبریالانو سازمان د فبرورۍ په څلورمه (سلواغې ۱۵) راپور ورکړی چې د طالبانو استخباراتي او امنیتي مامورینو په افغانستان کې ددې ډلې له واکمن کیدو راهیسې لږ تر لږه ۵۰ خبریالان او د رسنیو کارکوونکي نیولي دي.
د خبریالانو د ملاتړ دغه اداره وايي، خبریالان کله نا کله له تاوتریخوالي سره هم مخ شوي دي.
د بې پولې خبريالانو د راپور له مخې په تېرو دوو مياشتو کې په افغانستان کې د خبريالانو ګواښل، احضار او "خپلسري" نيول زيات شوي دي.
بې پولې خبريالانو ویلي دي: "د استخباراتو او امر به معروف و نهی عن المنکر وزارت لاسوهنه او ګواښونه د ډله ييزو رسنيو د قانون خلاف دي او موږ يې غندو."