د امریکا متحده ایالاتو ولسمشر ډونالد ټرمپ پرون جمعه ناوخته له لوړپوړو پوځي، سیاسي، او استخباراتي امریکايي چارواکو سره د افغانستان د مسئلې په اړه خبرې کړي دي.
دغه امریکايي چارواکو په یاده ناسته کې د څو ساعتونو لپاره تر بندو دروازو شاته د افغانستان په اړه غږېدلي.
د اسوشتیدپرېس خبري اژانس د راپور لهمخې چې د شنبې په ورځ د کب پر ۲۵مه خپور شوی ویلي چې په دغه ناسته کې د ټرمپ مرستیال مایک پنس، د امریکا د ټولو ځواکونو لوی درستیز جوزیف ډانفورډ، د امریکا د استخباراتو مشر جینا هسپل،د دغه هېواد ملي امنیت شورا سلاکار جان بولټن او د بهرنیو چارو وزیر مایک پمپیو ګډون کړی و.
یوې سرچینې چې په دغو خبرو کې ګډون کړی و اسوشیټډ پرېس خبري اژانس ته ویلي چې دغه ناسته د پنټاګون په یوه پټه خونه کې تر سره شوې ده.
تر دا مهاله د دغه ناستې په اړه نور جزئیات نه دي روښانه شوي.
دا په داسې حال کې ده چې د تېرې پنجشنبې په ورځ د کب پر ۲۴مه د افغان حکومت د ملي امنیت شورا سلاکار حمدالله محب په واشکنټن کې خبریالانو ته ویلي و چې زلمي خلیلزاد له طالبانو سره خبرو کې د «شخصي ګټو»په لټه کې دی او افغان حکومت د یادو مذاکراتو په اړه معلومات نه لري.
امریکا او طالبانو په "یوې مسودې" موافقه کړې
عبدالله: د قطر خبرو په اړه هم خوشبیني او هم اندېښنې شته
داودزی: قطر کې د بندو دروازو تر شا خبرې افغانانو ته د اندېښنې وړ دي
د حمدالله محب دغه څرګندونې د امریکايي چارواکو له سخت غبرګون سره مخ شوې او څو ساعته وروسته د امریکا د بهرنیو چارو وزارت هغه خپل وزارت ته وروغوښت.
په سیاسي چارو کې د امریکا د بهرنیو چارو وزارت مرستیال د افغانستان د ملي امنیت شورا سلاکار ته وویل چې زلمی خلیلزاد د امریکا د بهرنیو چارو د وزیر استازی دی او" پر سفیر خلیلزاد حمله د امریکا پر بهرنیو چارو وزارت حمله ده" او زیاته کړې ده چې دا ډول څرګندونې د امریکا او افغانستان حکومت ترمنځ په دوه اړخیزو اړیکو کې او د همدارنګه د سولې په بهیر کې د «ستونزې» رامنځته کولو لامل ګرځي.
محب له افغانستان سره د امریکا 'له پیرزوینې ډک' ملاتړ درناوی وکړ
تېره ورځ د افغانستان د ملي امنیت شورا سلاکار حمدالله محب بیا پر خپل ټوېټر د افغانستان څخه د امریکا د متحده ایالاتو "له سخاوته ډک ملاتړ" ارزښتناک وباله.
