طالبانو تیرو دوو ورځو کې په شپږو ولایتونو کې ښځو په ګډون ۲۷ کسان په دُرو وهلي

افغانستان کې د بدني سزاګانو په دوام د طالبانو تر کنټرول لاندې سترې محکمې په مختلفو ولایتونو کې د تعزیري سزاګانو د حکم د پلي کولو خبر ورکړی او ویلي دي چې په تیرو دوو ورځو کې یې د څو ښځو په ګډون ۲۷ کسان په عام محضر کې په دُرو وهلي دي.

دغې محکمې د سه شنبې د ورځې ناوخته فبرورۍ ۱۸ (سلواغې ۳۰) په یوه خبرپاڼه کې ویلي چې دغه سړي او ښځې یې د "کور څخه د تیښتې، غلا، لواطت او قتل" په تورونو د فاریاب، بامیان، نیمروز، تخار، غزني او خوست په ولایتونو کې نیولي و چې پرې د تعزیري سزاګانو حکم تطبیق شوی دی.

د سترې محکمې د معلوماتو له مخې طالبانو په دغه موده کې ۱۱ کسان په نیمروز، پنځه تنه په غزني، درې تنه فاریاب، څلور تنه تخار، درې تنه خوست او یو تن د بامیان په ولایت کې په دُرو وهلي دي.

دغې محکمې ویلي چې په دُرو په دې وهل شویو کسانو کې څلور یې ښځې وې چې د " کورڅخه د تیښتې" په تور په دُرو ووهل شوې.

د سترې محکمې د معلوماتو پر اساس دغو تورنو ته د ۲۰ څخه نیولې تر ۳۹ دُرو پورې سزاګانې ورکړل شوي او هم ددغو تورنو اکثرو ته یې شپږ، شپږ میاشتې د بند سزا هم ورکړل شوې ده.

طالبانو په دې وروستیو اونیو کې د تعزیري سزاګانو د تطبیق لړۍ چټکه کړې ده. ددې دمخه د طالبانو د حکومت سترې محکمې د فبرورۍ د روانې میاشتې په لومړیو دوو اونیو کې د ښځو په ګډون لږ ترلږه ۳۳ کسان عام محضر کې په دُرو وهلي دي.

طالبانو د ۲۰۲۱ کال د اګست په میاشت کې په افغانستان واک د بیا ترلاسه کولو وروسته په تیرو څه باندې دریو کلنو کې د ښځو په ګډون په سلګونو کسانو ته په مختلفو تورونو په ځانګړي ډول د اخلاقي جرمونو په تورونو په ورزشي سټډیومونو کې د زرګونو کسانو په مخ کې تعزیري سزاګانې ورکړي دي.

همداشان د طالبانو د حکومت سترې محکمې ویلي چې تراوسه یې په افغانستان کې په عام محضر کې شپږو کسانو ته د اعدام سزا هم ورکړې ده.

طالبانو په عام محضر کې د اعدام د سزاګانو په لړ کې وروستۍ د تیر ۲۰۲۴ کال د نومبر ۱۳( لړم ۲۴) د پکتیا په ولایت کې په عام محضر کې یو تن ته د طالبانو د حکومت دریو محکمو د پریکړو او د طالبانو د مشر ملا هبت الله اخوندزاده د تائید وروسته ورکړه.

د طالبانو د حکومت سترې محکمې ویلي و چې اعدام شوی کس محمد ایاز د حکیم خان زوی د پکتیا ولایت د میرزکې ولسوالۍ اصلي اوسیدونکی وو. دغې محکمې ویلي و چې محمد ایاز د حبیب الله په نوم د پکتیا ولایت یو اوسیدونکی وژلی وو.

د طالبانو حکومت د ملګرو ملتونو او د بشري حقونو د بنسټونو د پرله پسې غوښتنو سره سره په عام محضر کې د اعدام د سزا په ګډون د تعزیري سزاګانو پلي کیدو ته دوام ورکړی دی.