په کندز کې ولایتي چارواکي وايي، وسله والو طالبانو تیره شپه ( د تلې ۱۸ مه)د قلعه ذال ولسوالۍ د سرحدي پولیسو پر یو کنډک په برید کې ۱۵ تنه افغان سرحدي سرتیري وژلي دي.
د کندز د ولایتي شورا غړی سید اسدالله سادات وايي، چې د سرحدي سرتیرو پر کنډک د طالبانو په برید کې ۱۵ تنه افغان سرحدي سرتیري وژل شوي او ۱۳ تنه نور ټپیان شوي دي.
نوموړی وايي، چې په کنډک کې موجوده ټوله وسله او تجهیزات وسله والو طالبانو له ځان سره وړي دي او کنډک د یو محلي پولیس په مرسته بیرته نیول شوی دی.
د کندز د والي ویاند عصمت الله مرادي پیښه تاییدوي خو د جزیاتو په اړه څه نه وايي.
د کندز د پولیسو ویاند انعام الدین رحماني هم مطبوعاتو ته د سرحدي سرتیرو د وژل کیدو په اړه له ځواب ورکولو ډډه کړې ده.
د طالبانو یو ویاند ذبیح الله مجاهد مطبوعاتو ته په یو ټلیفوني استول شوي پیغام کې ادعا کړې چې قلعه ذال په سیمه کې د پولیسو سرحدي کنډک کې میشت ۲۵ تنه سرتیري یې وژلي دي او ددوي ټول تجهیزات یې له ځان سره وړي دي.
