د افغانستان سره د درې یو ورځنیو لوبو د لړۍ لومړنۍ لوبه د جمعې په ورځ فبروري ۹ (سلواغې ۲۰) د ۴۲ منډو په توپیر سري لانکا وګټله.
د سري لانکا په کېنډي کې ددې لوبې د پچې له ګټلو وروسته د افغانستان کپتان حشمت الله شهیدي کوربه لوبډله لومړی توپ وهلو ته وبلله. سري لانکا د درې لوبغاړو په سوځېدو افغانستان ته د ۳۸۲ منډو هدف وټاکه.
په ځواب کې، په لومړیو ۵۰ منډو د افغانستان پنځه لوبغاړي وسوځېدل. خو په پنځمه ویکټه د افغانستان توپ وهونکو محمد نبي او عظمت الله عمرزي له ۲۰۰ زیاتې منډې وکړې او داسې برېښېده چې افغانستان به دغه ستر هدف پوره کړي.
د ۱۳۶ منډو کولو وروسته د محمد نبي سوځېدو د افغانستان د منډو کولو بهیر سوړ کړ. عظمت الله عمرزي په دغه لوبه کې ۱۴۹ منډې وکړې او ترپایه و نه سوځېد.
د سري لانکا پرانیستونکي توپ وهونکي پاتم نیسانکا ۲۱۰ منډې وکړې او ترپایه ونه سوځېد. نوموړی د لوبې ترټولو غوره لوبغاړی ونومول شو.
د افغانستان توپ اچونکي فرید احمد د سري لانکا دوه لوبغاړي وسوځول. محمد نبي هم د مقابل لوري یو لوبغاړی وسوځاوه.
په دغه لوبه کې د افغانستان وتلي لوبغاړي راشد خان چې تازه یې د ملا جراحي عملیات کړي، برخه نلرله.
د افغانستان او سري لانکا تر منځ تراوسه د یو ورځنیو لوبو دوه لړۍ شوي دي. د ۲۰۲۲ کال لړۍ یو-یو مساوي او د ۲۰۲۳ کال لړۍ ۲-۱ د سري لانکا په ګټه پای ته رسېدلې وه.
د افغانستان او سري لانکا ترمنځ یوازنۍ ټیسټ لوبه تېره اونۍ سري لانکا وګټله.
د ۵۰ اوریزو لوبو د روانې لړۍ دوهمه او درېمه لوبه ددې میاشتې په ۱۱ او ۱۴ نېټو ترسره کیږي.
ټاکل شوې ده چې د یو ورځنیو لوبو وروسته د دواړو خواوو ترمنځ درې ۲۰ اوریزې لوبې هم وشي.
فورم \ دبحث خونه