د طالبانو د حکومت د ټولګټو وزارت وايي چې د سالنګ لویه لار چې د واورې د اورښت او د لارې په اوږدو کې د سخت طوفان له امله تیره شپه د ترافیکو پرمخ تړل شوې وه ددغې لارې د ساتنې او څارنې ریاست کارکوونکو د هڅو په پایله کې نن غرمه مهال د کوچنیو مسافر وړونکو موټرو پرمخ بیرته پرانیستل شوې ده.
ددغه وزارت ویاند محمد اشرف حق شناس د شنبې په ورځ د جنورۍ ۱۸ (مرغومې ۲۹) د ایکس په ټولنیزه شبکه کې په یوه خپره کړې خبرپاڼه کې ویلي چې د سالنګ لویه لار نن د غرمې دمخه شاوخوا ۱۱:۳۰ بجې د تیز رفتارو موټرو پرمخ پرانیستل شوې ده.
محمد اشرف حق شناس ویلي: "د سالنګ لویه لار چې د سختې واورې د اورښت، د لیدو د ساحې محدودیت او د سخت طوفان له امله تیره شپه تړل شوې وه نن د شنبې په ورځ د غرمې دمخه ۱۱:۳۰ بجې د سالنګونو د ساتنې او څارنې ریاست د کارکوونکو د هڅو په پایله کې د تیز رفتاره مسافر وړونکو موټرو پرمخ پرانیستل شوه او هغو تیزرفتارو مسافر وړونکو موټرو ته چې د تیرې شپې راهیسې د لارې په دواړو خواو کې ایسار پاتې وو د حرکت اجازه ورکړل شوې ده".
خو د ټولګټو وزارت ویاند د وارو د اورښت د دوام په صورت کې ددغې لارې د بیا تړل کیدو احتمال هم نه دی رد کړی.
دغه وزارت د سالنګ په لویه لار د تیریدونکو موټرو د چلوونکو څخه غوښتي چې پر دغه لار د سفر پرمهال دې د ژمي د موسم وسایل له ځان سره ولري او د لویې لارې د ساتنې او څارنې ریاست کارکوونکو سپارښتونو ته دې جدي پاملرنه وکړي.
د ټولګټو وزارت ویاند ددې لارې د بندیدو د خبر پر مهال په یوه خبرپاڼه کې ویلي وو: "د سالنګونو لویه لاره د واورې د اورښت، طوفان، د لید ساحې محدودیت، او د انساني تلفاتو او مالي زیانونو د مخنیوي په موخه، نن شپه په ۳۰ : ۱۱ بجو، د ټولګټو وزارت تر بیا خبرتيا پورې د هر ډول وسایطو پر مخ د لنډ وخت لپاره تړل شوې ده."
هغه ویلي چې د سالنګونو د ساتنې او څارنې ریاست دسالنګونو لویې لارې د دواړو لورو له زیان منونکو سیمو څخه د وسایطو انتقالول یې هم پیل کړي دي.
په دې خبرپاڼه کې ویل شوي: "له درنو هېوادوالو او محترمو مسافرو چې د يادې لویې لارې څخه د تلو په حال کې دي په ټينګه غوښتنه کېږي چې په مناسب او خوندي ځایونو کې ودریږي. همدارنګه له درنو هېوادوالو څخه په خورا درنښت غوښتنه کوي له ضرورت پرته دې د سالنګونو لویې لارې پرګډون د هېواد په زیان منونکو لارو تګ راتګ نه کوي".
دا په افغانستان کې د روان ژمي د پیل راهیسې څلورم ځل دی، چې د سالنګ لویه لار د واورو د اورښت او طوفان له امله د موټرو د تګ راتګ پرمخ تړل کیږي.
نږدې دوه اونۍ وړاندې هم دا لار د واورو د اورښت له امله د دریو ورځو لپاره تړل شوې وه، چې جنورۍ په شپږم (مرغومې ۱۷) بیرته د ترافیکو پرمخ پرانیستل شوه.
د سالنګ لویه لاره نه یوازې د افغانستان پایتخت کابل د شاوخوا لسو شمالي، شمال ختیځو او شمال لودیځو ولایتونو سره نښلوي، بلکې دا لار د منځنۍ اسیا د څو هیوادونو او پاکستان ترمنځ هم د ترانزیټي مالونو د انتقال لپاره کارول کیږي.
په عین وخت کې د طالبانو د حکومت د ترانسپورټ او هوايي چالند وزارت د هواپيژندنې ریاست نن او سبا ته د افغانستان په ۲۹ ولایتونو کې د واورې او باران د اورښت اټکل کړی دی.
همداشان دغه ریاست د سالنګونو په ګډون د افغانستان په لودیځو،جنوبي، ختیځو او مرکزي ولایتونو کې د سختو بادونو د لګیدو خبر هم ورکړی دی.
افغانستان کې د واورو او باران د اورښت دا لړۍ په داسې حال کې پیل شوې، چې ددې هیواد خلک د اوږدې وچکالۍ څخه کړیږي. ملګري ملتونه وايي چې افغانستان د نړۍ په هغو لسو هیوادونو کې شامل دی، چې د اقلیم د بدلون د خورا سختو اغیزو سره مخ دی او ددغو اغیزو د کمولو لپاره چمتوالی هم نلري.
ملګرو ملتونو ویلي چې په افغانستان کې د پرله پسې دریو کلنو روانې وچکالۍ په دغه هیواد کې اوبو ته د خلکو اړتیا خورا زیاته کړې ده.
د ملګرو ملتونو د بشري مرستو د همغږۍ ادارې "اوچا" ویلي، چې په افغانستان کې د ۲۰۲۱ کال راهیسې اوبو ته د خلکو اړتیا ډیره زیاته شوې او۶۷ فیصده کورنۍ د اوبو د ترلاسه کولوهڅې کوي.
فورم \ دبحث خونه