د بې پولې خبریالانو ټولنه وايي، که په افغانستان کې وسله وال مخالفین په تېره بیا طالبان په خبریالانو او یا په رسنیو هر ډول برید وکړي، نو د طالبانو هغه سیاسي استازي چې په بهرنیو هیوادونو کې میشت دي ځواب ویونکي باید وي.
د افغانستان، ایران او تاجکستان لپاره د بې پولې خبریالانو د ټولنې مشر رضاء معیني په کابل کې د خبریالانو د امنیت په یوه کنفرانس کې وویل چې د کندز له پېښې وروسته د طالبانو ګواښ د اندېښنې وړ دی او د ټولو نړیوالو قوانینو په اساس باید دا ډول ګواښونو ته ځواب وویل شي.
رضاء معیني په څرګند ډول د طالبانو د قطر دفتر یاد کړ، چې رسنیو ته د هر ډول ګواښ په صورت کې باید ترې پوښتنې وشي.
د بې پولې خبریالانو د ټولنې دغه لوړ پوړي مسؤل وویل" له دې وروسته طالبان او نورې وسله والې ډلې که د افغانستان په هر ګوټ کې د رسنیو په وړاندې بریدونه وکړي، د دوی بهرني استازي، په ځانګړي ډول د دوی د دوحې دفتر او نور هغه کوربنه هیوادونه چې دغو ډلو سره اړېکې لري، باید ځواب ویونکي اوسي. دا یو ګواښ ندی دا یو واقعیت دی."
د بې پولې خبریالانو ټولنه وايي، چې د خبریال امنیت د ټولنې امنیت دی، او په رسنیو برید په ټولنې برید دی.
پدغه کنفرانس کې امنیتي وزارتونو استازو هم برخه اخېستې وه او د خبریالانو د مصؤنیت او امنیت لپاره یې د خبریالانو سره ژمنې وکړې وې ویل چې په هر ډول حالت کې د خبریالانو او رسنیو امنیت ساتي.
د کورنیو چارو وزارت امنیتي مرستیال محمد ایوب سالنګي وویل د حکومت له خوا هیڅ په رسنیو سانسور او محدودیتونه نشته دي او د خبریالانو امنیت ته مسؤل دي.
د دفاع وزارت ویاند دولت وزیري بیا وویل هیڅ داسې مورد نشته چې خبریال د دفاع د وزارت یا اردو له خوا ګواښل شوی وي.
پدغه کنفرانس کې خبریالانو دا هم ویل چې د دولتي بنسټونو له اړخه خبریالانو ته په ګواښونو کې هم زیاتوالی راغلی دی.
د رسنیو د مصؤنیت بنسټونو ویل چې حکومت باید د هغو ګواښونو مخه ونیسي، چې رسنیو ته مواجه دي.
د خبریالانو د خوندیتوب د کمېټې مشر نجیب شریفي وویل تر بل هر وخت اوس د خبریالانو د امنیت په اړه جدي بحث ته اړتیا ده.
د رسنیو مسؤلینو ویل چې په تېرو څوارلسو کلونو کې رسنیو ښه وده کړې ده خو باید د راتلوونکي لپاره هم د بیان ازادي پر خپل ځای پاتې شي