د فلیپین سره ددغه هېواد په ساحل کې د متحده ایالاتو، کاناډا او استرالیا دوه ورځني ګډ هوايي او سمندري پوځي تمرینات د چهارشنبې په ورځ اګست اوومه (زمري ۱۷) پیل شول.
ددغو هېوادونو لوړپوړو پوځي مشرانو په یوه ګډه اعلامیه کې وویل چې دا تمرینونه "د هند - ارام سمندر په سیمه کې د ازاد او پرانیستي [تګ راتګ] د ملاتړ لپاره زموږ ګډه ژمنتیا ښيي."
چین په دې سیمه کې ټول سمندر خپل ملکیت ګڼي او په دې وروستیو کې داسې اندیښنې زیاتې شوي چې د چین دغه ادعا او د تایوان له خپلواک ټاپو سره د بیجینګ تاوتریخوالی ممکن متحده ایالات هم ښکېل کړي.
فلیپین تېره اونۍ هم د جنوبي چین په سمندر کې د متحده ایالاتو او جاپان سره په جلا جلا توګه دوه ورځي پوځي تمرینات ترسره کړي وو.
ټاکل شوې چې مانیلا د جمعې په ورځ په خپل ساحل کې له ویتنام سره د ساحل ساتونکو ځواکونو تمرینونه وکړي.
فلیپین له متحده ایالاتو سره دفاعي تړون لري او د جاپان سره یې تېره میاشت دغسې یو تړون لاسلیک کړ چې له مخې یې دغه هېوادونه د یو بل په خاوره کې پوځیان ځای پر ځای کولی شي.
د فلیپین د پوځ یو ویاند فرانس پرس ته وویل چې د څلورو هېوادونو ګډ پوځي تمرینات په لومړي ځل په لاره اچول کیږي د سمندري او هوايي ځواکونو قطعې پکې برخه اخلي.
په ګډه اعلامیه کې ویل شوي چې "د برخه اخیستونکو هیوادونو د سمندري او هوایي ځواک قطعات به زموږ د وسله والو ځواکونو ترمنځ د همکارۍ د وړتیا لوړولو لپاره په ګډه کار وکړي."
په اعلامیه کې په دې تمریناتو کې د برخه اخیستونکو بیړیو او نظامي قطعاتو نومونه ندي یاد شوي، خو زیاته شوې: "استرالیا، کاناډا، فلیپین او متحده ایالات د سمندري تګ راتګ او د الوتنو د ازادۍ حق، د سمندر او نړیوالې فضا نور قانوني استعمال، او همدارنګه د نړیوالو قوانینو له مخې د هغو سمندري حقونو درناوی کوي چې د ملګرو ملتونو د سمندر د قانون په کنوانسیون کې منعکس شوي دي."
فورم \ دبحث خونه