په واشنګټن کې د ناټو په سرمشریزه کې د مشرانو لخوا د مسکو او بیجینګ د پیاوړو اړیکو له کبله د مخ په زیاتېدونکي ګواښ له خبرداري وروسته، چین د جمعې په ورځ جولای ۱۲ (چنګاښ ۲۲) وویل چې له روسیې سره په جنوبي ساحل کې ګډ پوځي تمرینات کوي.
د چین د دفاع وزارت ویلي چې د دواړو هېوادونو پوځونو د جولای په لومړیو کې د "ګډ سمندر - ۲۰۲۴" په نوم تمرینات پیل کړي او د دې میاشتې تر نیمایي پورې به دوام وکړي.
وزارت وویل چې د جنوبي ګوانګ دونګ ولایت د ژانجیانګ ښار په شاوخوا کې په اوبو او فضا کې تمرینونه "د سمندري امنیت ګواښونو سره په ګډه د مبارزې او د نړیوالې او سیمه ایزې سولې او ثبات د ساتلو لپاره د دواړو خواوو هوډ او وړتیاوې څرګندوي."
وزارت زياته کړې چې دغه تمرينونه به "د نوي عصر لپاره د چين او روسيې هراړخيزې ستراتيژيکې همکارۍ لا همغږي او پياوړي کړي."
د وزارت په وینا، دا تمرینات د نظامي ښکیلتیا لپاره د بیجینګ او مسکو د کلني پلان سره سم ترسره کیږي.
ددې تمریناتو سره په یو وخت کې، په همدې اونۍ کې د ناټو مشرانو په واشنګټن کې د روسیې د یرغل په وړاندې د اوکراین د ملاتړ د بیا تائید لپاره غونډه وکړه.
چین او روسیه په وروستیو کلونو کې سره نږدې شوي، خپله ملګرتیا "بې حده" بولي او دواړه له ناټو سره له دښمنۍ ډکې اړیکې پالي.
د ناټو مشرانو د چهارشنبې په ورځ په یوه اعلامیه کې وویل چې چین په اوکراین باندې د مسکو د یرغل "پریکنده ملاتړ کوونکی" او دا کار لامل شوی چې بیجینګ ناټو ته د "جنجال رامنځته کولو" پروړاندې خبرداری ورکړي.
چین ټینګار کوي چې د اوکراین په شخړه کې طرف ندی واقع شوی، خو د لوېدیځو مشرانو له خوا ورباندې له روسیې سره د ملکي او پوځي توکو د سوداګرۍ په شمول د مسکو د سیاسي او اقتصادي ملاتړ له امله نیوکه شوې ده.
چینايي ځواکونه په دې اونۍ کې د ناټو په ختیځه پوله کې د روسیې له بل متحد بیلاروس سره هم تمرینات کوي.
او جاپان د جمعې په ورځ وویل چې خپلې خاورې ته نږدې د چین او روسیې ګډ فعالیتونه "د ملي امنیت له نظره جدي اندیښنه" ګڼي.
فورم \ دبحث خونه