د پاکستان د کرکټ ملي لوبډلې په پرله پسې توګه د شلو شلو اورونو درې واړه لوبې په سریلانکا وبایللې.
دا لومړی ځل دی چې پاکستان پخپلې خاورې کې د شلو شلو اورونو لړۍ بایلي.
د پاکستان ټیم چې په اوس وخت کې د کرکټ د کرکټ د نړیوالې شورا د شلو شلو اورونو په درجه بندۍ کې لومړی مقام لري، درې پرله پسې لوبې یې د سریلانکا په لوبډلې وبایللې.
په دریمه لوبه کې سریلانکا د پاکستان لپاره د ۱۴۸ منډو هدف ورکړی و چې د پاکستان لوبډلې پوره نشو کړی.
دا لوبې د پاکستان د لاهور ښار په قذافي لوبغالي کې کیدلې. د ۲۰۰۸ کال راپدیخوا چې د سریلانکا په لوبډلې ترهګریز برید وشو ، نړیوالې لوبډلې پاکستان ته د تګ لپاره زړه نه ښه کوي او پاکستان خپلې اکثریت لوبې په عربي متحده اماراتو کې کوي.
خو د سریلانکا لوبډله پاکستان ته د دریو یو ورځنیو او دریو د شلو شلو اورونو د لوبې لپاره هغه هیواد ته ورغلې وه. د سریلانکا په لوبډله کې اکثریت نوي او ځوان لوبغاړي و.
