د ایران د سپاه انقلاب مشر د سه شنبې په ورځ ویلي دي چې دیته ضرورت نلري چې د توغندیو د واټن ویشتلو صلاحیت زیات کړي ځکه چې اوس هم د هغوي توغندي امریکایي عسکر په نښه کولی شي.
د امریکا ولسمشر ټرمپ غواړي چې د ایران د توغندیو د پروگرام د مخنیوي لپاره په هغوي اقتصادي بندیزونه ولگوي. د ایران د سپاه انقلاب مشر جنرال محمد علي جعفري وایي چې "بندیزونه به د ایران د توغندیو شمیره او د هدف ویشتلو وړتیا لا نوره زیاته کړي."
تیره میاشت ولسمشر ټرمپ د ایران سره د اتومي وسلو د مخنیوي په سر موافقه تائید نکړه او امریکا یې ترینه وویستله. امریکا او د نړۍ شپږو قدرتمنو ملکونو د ایران سره د اتومي وسلو د مخنیوي په سر دغه موافقه لاسلیک کړي وه چې په بدل کې یې د ایران نه اقتصادي بندیزونه لیرې کړي و.
تیره اونۍ د کانگرس غړو په ایران د نوي اقتصادي بندیزونو د لگولو په پلوۍ رایگیري وکړه چې هدف یې د ایران د بالیستک توغندیو د پروگرام مخنیوی دی.
ولسمشر ټرمپ د خپلو متحدینو نه غوښتي دي چې د ایران په هکله دې د امریکا د دریځ ملاتړ وکړي او د ایران د توغندیو د پروگرام د ځبلو لپاره دې جدي او سخت اقدامات وکړي.
جعفري د خپل توغندیو د سرعت او د واټن ویشتلو د وړتیا په هکله وویل "زمونږ توغندي ٢٠٠٠ کیلومیټرو پورې واټن ویشتلې شي او مونږ کولی شو چې دغه لا نور زیات کړو. خو مونږ په دی باور لرو چې د امریکایي عسکرو د نښه کولو لپاره دغه هم پوره ده."
جعفري وویل چې امریکا غواړي د ایران اقتصاد ته تاوان ورسوي.
امریکا وایي چې د ایران د توغندیو پروگرام د نړیوالو قوانینو نه سرغړونه ده ځکه چې دغه توغندي اتومي کوپړۍ هم انتقالولی شي.
