د ماشومانو د نړیوال صندوق ”یونیسف” راپور ورکړی چې په یمن کې ۱.۸ ملیونه ماشومان په خوار ځواکۍ یا سوءتغذي اخته دي،او شاوخوا ۴ سوه زره یې له شدیدې سوءتغذي رنځ وړي.
په یمن کې د یونیسف استازې، مرتلکسل رالانو د رویټرز خبري اژانس ته ویلي چې روانې جګړې په دغه هیواد کې د ماشومانو لپاره ژوند په دوزخ بدل کړی.
هغه زیاتوي چې په یمن کې د ۱۱ ملیونه ماشومانو عمرونه له ۱۸ کلونو څخه ټيټ دي او ټول یې د خوراک د نشتوالي په شمول له ګڼو نورو ټولنیزو ستونزو سره مخ دي او ډيریې ابتدایي خدمتونو ته هم لاسرسی نلري.
د سعودي عربستان په مشرۍ پوځي ائتلاف چې د امریکا ملاتړ ورسره دی، د ۲۰۱۵ کال د مارچ له میاشتې راهیسې د حوثي یاغیانو په اهدافو ګڼې هوایي حملې کړي دي.
د یمن جنګ په دغه ملک کې په یوه لوي بشري بحران بدل شوی چې د دغه هېواد د ۲۸ ملیونه وګړو څخه یې ۸.۴ ملیونه له لوږې سره مخ دي او ۲۲ ملیونه نور یې په بشري مرستو پايي.
د سعودي عربستان او متحده عربي اماراتو چارواکي وایي هغوي به د یمن له خلکو سره خپلو بشري مرستو ته دوام ورکړي.
د ملګرو ملتونو د بشري مرستو د تنظیمونکې ادارې ویانده، لیز ګرندې په یوې اعلامیې کې ویلي چې د یمن جګړې یو بشري بحران رامنځ ته کړی او دغه بحران په هیڅ وجه د توجیه کیدلو وړ نه دی.
هغې له ښکېلو غاړو غوښتي چې ملکي خلکو ته د بشري مرستو د رسولو په لاره کې خنډونه جوړ نکړي او هغوي سره مرسته وکړي چې بشري مرستو ته لاسرسی پیدا کړي.