د ننګرهار ولایت چارواکي وايي چې نن له غرمې مخکې یولس بجې د اچین ولسوالۍ په مامند دره کې په یو سراچه موټر ماین چاودنه کې یولس ملکیان وژل شوي.
د والي ویاند عطا الله خوږیاڼي امریکا غږ ته وویل چې چاودنه په داسې حال کې شوې ده چې د ملکیانو موټر د مامند څخه پر لاره و او له سولۍ ډک و.
نوموی وايي چې په وژل شويو کې شپږ ماشومان او یوه مېرمن هم شامله ده .
د مامند درې په لوړو څوکو کې داعش وسله وال حاکم دي.
تر اوسه ددغې پېښې مسولیت کومې وسله والې ډلې په غاړه نه دی اخیستی.
د اچین ولسوالۍ یو قومي مشر ملک کمین امریکا غږ ته وویل چې وژل شوي ټول د یوې کورنۍ غړي دي، غوښتل یې چې د داعش له وېرې راښکته سیمو ته راووځي خو چاودنه پرې شوې ده.
د اچین ولسوالۍ یو اوسېدونکی قیوم جان وايي چې چاودنه دومره زوروره وه چې هیڅوک ترې ژوندي نه دي وتلي.
کونړ کې ډرون برید درې ماشومان وژلي
د کونړ د والي ویاند غني مصمم امریکا غږ ته وویل چې تېره ورځ د نرګ ولسوالۍ باډېل دره کې ډرون برید کې درې ماشومان وژل شوي چې دوه پکې جینکۍ دي.
د سیمې خلکو له نن سهار راهیسې جنازې د سرک پر سر ایښي او د کونړ جلال اباد لاره یې تړلې ده او لاریون یې پیل کړې دی.